Ая Iайи бахтлу лихунар, багулив файя инсанарин идже хиялар, фикирар гьучадес аркьаттар. Детсадттин воспитательница пугуна гьучаве — иджвел, шадвел, вал юркI алийивел, Iудпе баб.
Хьес джаллабурис ягIа детский садик — э тамашин, шадттин, нандиъра адава хIуькумат. Гисаъ бицIи шиникквари гъуршанде чиппис ягIарвелар, фагьумвелар, илдешвелар, гъушанас учис хIа мукьар. Гебур джалла акьас гебурис ягIар арка гIелимари, воспитателари- хIекьдан шиникварин юркIарин, руьхIерин духттурари.
Воспитателари э гисаъ ибгIа, ккане, идже гьава аркьаф, гебури э гисаъ шиниквдин эхъ, шадвел гуланас адартаф.
Сара фи хIа иджвел э аяф, шиниккварин сагъвелдиласра, шиниккварин эхъерилас.
Зун чвас ягIа ахъакьасе са ке Iайи идже воспитательницайихъас Агъуларин райондиъ, Типпигъарин хIуриъ «Солнышко» агъа садикдиъ кар аркьаттихъас.
Ге э Курбанова Майя Магомедовна. Са Iу чIаларилди ахъакьасе гин Iуьмурдин рекъуьхъас. Майя Магомедовна 1976-пе иса. 8-пе класс ккиркIугъилди. ушуне хурас Буйнакскдин педучилищейиди. 1980-пе иса, хуруна ккиркIухаб тевус, адине хIуриди. 1980-пе исалас1984-пе исахъди рукьуна кар аркьай хьуне ЧIаарин хIурин махьтабиъ бицIиттарин мегIелимвелди.
1984-пе исалас мич кар аркьафе Типпигъарин хIуриъ, детсадикдиъ воспитательницавелди.
Курбанова Майя Магомедовна ппара Iекьул, фагьум файя, инсанвел, сабур хъайя дишагьли э.
Гьер ягъа учин йиркIуран ибгIавел Майя Магомедовнайи ирцIанде учин гъиликк ккея шиниккварис. Учин кар ппара йиркI фай аркьа ги. Гис шиникквар зеф, веф агъа чIал ягIайдава,гебурин арайиъ Iекнуквел ги аркьаф дава. Гьер хIаягъас ппара батIар мегIракабур хIезур арка Майя Магомедовнайи. Гин мегIракабури шиниккварин йиркIвар шадвелди ацIас аркьа. Шиникквар батIарди хIезур хьуна аве гин мегIракабурис. Агьал гив фаф ке хIа группа э, хьидана махьтабиди вереф.
Майя Магомедовнайи са шиниккварихъай дава кар аркьаф. Ги учихъай къулугъил алде илдешарисра ацIуна кумак аркьа, дагIа кар ягIар аркьа, шиникквар вардиш акьас, гьер джурейин мегIракабурис шиникквар хIезур акьас.
Майя Магомедовна 38 ис э кар аркьай «Солнышко» садикдиъ. Кардин батIар эеси идехIела, ацIуна джавизара файя гив. Майя Магомедовна э «Почетный работник образования РФ».
«Зас ппара кканде зе кар, зе шиникквар, захъай кар аркьа илдешар. Гебур хъадавай, кар даркьай завас экьвас хьасттава. Зе шиниккварихъай зунра ачархьа фикирди зе бицIи вахттариъ. Зун гьегебурихъай дурхIа, элхъенде, тамашибур аркьа. Зе карди зун гьер ягъа ачархьас аркьа зе бицIи вахттуниъ.» — агъа Майя Магомедовнайи.
Майя Магомедовна инсанарихъай гIартIаф э, йиркI алиянас ягъафе сасрайил.
Учин илдешарихъай ппара нуьхIуьбатилди аве Майя Магомедовна, гебури чиппин багухъас гис хIуьлматара ппара аркьа.
Ппара инсанарис са Iайи рехIетин кар суман ве воспитетельвел. Фи гебури аркьаф, дурхIай, элхъенди, ишкилар атай, мегIнибур, лихъунар аркьай, Iелди, ухай экьунаттар агъа гебурис.
Ама ппара читин кар э воспитательвел акьас.
Вас шиникквар кканхьуна кканде, гебури вас чиппин йиркьвар дахъас. Шиникквар даканттивас ме кар акьас верефттава. Ппара тич, мич гьуккуна кканде, шиникквдис ве кканвел агвар акьуна кканде, вун гин Iудпе баб хьуна кканде. Дипломар фаттаривас дава акьас вереф воспитательвел, йиркIв ачукъ идеттивас
Учин хизанарисра Майя Магомедовнайин учин йиркIв ирцIанде. Учин шувахъай, Кубай Раджабовичахъай ге ппара хIуьлмат- нуьхIуьбатилди дуламиш вея. Гихъасра ппара ликIенас хьасе, амма гихъас хьин джуре ахттилат акьасе.
Майя Магомедовнайихъна Кубай Раджабовичахъ хъайя гIуьфу шиниккв: Iу кIиркIна хIибу руш. Гебурис джаллабурис йине гьава гIилмибура, джалла дуьхьуьна сакин акьуне. Шибера, шиникквара чиппис кканегъилди дуламиш вей ая. АцIуна хуттулара хъая мебурихъ.
«Зун бахтлу инсан э — эл ккидиква, гьер ягъа са джурейин, гIачIугъу кар дагIаф. Зун шад э зе кканвел, шадвел, Iекьул, гIилмибур зе шиниккварис ес вереф. ДехIела, хаб цIекIиластти хъучучIас вейчин зе Iуьмур, зун гьеме кар дала хаб гIаттивасттавуйи,» — агъа Майя Магомедовнайи.
Хъара джандин сагъвел кам дакьурай ве, Майя Магомедовна, хье шиниккварис Iекьулар, дарсар ес.
Нафият Шамсудинова
