Исар — вазар алттвередегьен инсанар вардиш хьуне коронавирус агъа итталихъди. Фиштти хьунара мин хIелра ягIархьуне, эхIттиятар акьасра алучIа. Алттухъ инсанар завалхьуна усариди вес алучIайдава, байирдиас хулади ачадифна сад гъилар Iуьрччанде, кIилин ягъди сайишттира хIел-хIел аркьай гъилариъ адарка мертт аркьа хьеттар. БицIиди джандин гьава духIуба вере арайи, начагъ иттархьас алучIа вахттуни, инсанди учивас вередегьенттар, ягъадехьенттар аркьа Iайи джан фаддихьас. Айчира, фидегьен джирехIвелар акьучира, ягIайин ягъас ме итталин хIел ке иджи аркьаф вакцинация э. Хье вилаятин хIа пай джемеIети гьалдис йирхIуная коронавирусдин руб. Ме ягъари руб йирхIуттарин джалгайигI гIачархьуне Кубутаева Мариян Рамазановна.

-Мариян Рамазановна, ассаламу алейкум! Фиштти разивел йине вун коронавирусдин руб йирхIас?

-Ваалейкум ассалам! Зас ме итталин рубухъас хабарар ппара унихьуна уйи. Айчира, вей-вей ппара унихьудегьен ме итталихъас, фикир акьас алчархьа, фиштти акьучи иджи э гьан пуна. Хабди, духттурарилра йиркIв алийина, гъавурдиъ архьуне зун ме иттал зарафат даваф. ИдехIела са захъас фикир акьуна давуйи зун ме руб йирхIас рази хьеф. Зе сагъвел суман, зас багьа э зе хулан хизанара, багу-кIилара. Аметтарисра насихIет аркьая зун, вархалди дадивуна, вахттуни вакцинация акье пуна.