ЯгIа зас ахъакьас кканди ая зе Iуссе хIададахъас Магомедов Бициф Магомедовичахъас. Ме хуф э 1912 иса Типпигъарин хIуриъ. Джалла те вахттунин шиникквар суман хIа хьуне мера алтухъ девлетлу дава хизанарин арайиъ. Джалла джемеIетин шиниккварихъай лирханди, курар аркьай, учивас аттрукьу кумакар аркьай хулас дуламишвел аркьай хьуне. Алтухъ яшара гьудуркIуна акьуне мис хизанра. Са вахттра дахьуна, 1939 иса файшуне армиди. Армибур ккиркIва вахттарихъди, гъайшине хье вилаятин ке хIа дегIви. КьацIра хуладира фадатуна армиас, 18 январьди 1942 иса Хеварин РВК гьикуне 384 стрелковый полкдиди. Хабди хьуне ме 218-пефна 26-пе стрелковый дивизибуриъ. ДегIвикес дагуф адавуйи мис. Гашар, мекIер, азиятар, зулумар. Джандик ягъниш кидава мукь адавуйи хIададан. Са нубати, бомба чурхъу арайи, мис киркьуне кедахъу тикабур. Хабди адарцуна са лекуас аттивуне цIеякьу тика, хъара аттивас дахьуна учин аме кIилин Iуьмурдисра илгуттара ами. Михъас хIурджал леку Iатт аркьай ами хIадада. Гьадахъуна уйи гъилин тIубара.
Алтухъ дегIвин ахттилатар ахъакьас ккандавуйи хIададас. Мин хасиятин къикъевелдигьас ламусди алтухъ мивас хабар гъушанасра вейдавуйи. Ппара къикъи и мис кIвалас акьас инсанарил руцу ягъар, Iуьшар. Хъая, агуна-гулуна ушу илдешарин Iуьр кьацIра хум вейдавуйи мис. Хулаъ экьуна хияларигI гIачафайшу вахттуни яваштти, учикес аркьайи «Катюша» мегIнин макьам. Ме арайи хулан хизанарис ягIарвейи мин фикирар нандиъ айчин, хиялар фиттихъас ичин.
МегIнибурин пешабура ппара куьйи мик. Армиъра, дегIвиъра отрядиъ мегIнин кIил гъареф акьуна уйи микес джилар батIарттар уйихIела.
Са сагелай экьу ирхе Iурдин Iуьшари, йиркIурас кьагьар хье вахттуни, ахъаркьайи алчархье ягъар – Iуьшар.
Миштти, са нубати кIилди хъая отряд гъачархьуне мебур дарагIди. Фая кьафун ккиркIуна, хьуне мебурис гаш. ДарагI джикIи некьибурикес алтухъ фунар арцIайдавуйи. Сара, аркьаф-даркьаф дагIай, гьер ягъа нубат хъихьуна, чиппин яIариъ ая чилар цIабуригI уджай, кечIуркьай ахьуне мебур. ХьиликIи мал, нахшир фачархье арайи хIаягъ хьеф дегьен шад верефи агъайи чаб.
Хъара алтухъ ахттилатар даркьайчира, учис йиркIурас кьагьарди айчира, уч душмандин гъилиъ ачархье вахттара ахъаркьайи. Бахттунис, Iу-хьибу ягъ дала дахьуна, ади хье къушуми ачухъ акьуне мебур.
«Немцарин хумбарис суман ямагар акьас ягIайдава чвас», — агъафи хIадада, хабди хулан хизанарис зарафатар аркьай.
ДегIви кIиркIу вахттуни, хIуькуматил адина хIел агуна, мин кIацIра муш кидавуйи агъа хIурар, шагьурар, хулар, инсанар амилгванасе пуна. Учис йина кеджара, фиркьа мебурикес агъай, тембеку гIархъай, папрусар аркьай чIир акьуне. Хабди ме кеджар фадавай ппара бизар акьуне хIуькуматикес рукьа манатар дайирцIанди.
Хье вилаяти гъалибвел гъушуф, адине хIадад хIуриди. Хьуне мебурин хизандиъ гIуьфу рушна са кIиркIра. Аркьай колхозарин, совхозарин курар, дуламиш хьуне хизанарин. Сайишттира хIададак гъилин кидава пеша адавуйи: гъвандин, кIуранин, сувагъарин. Йина уйи мис медаларна орденара. «Тридцать лет победы в Великой Отечественной войне 1941-1945 гг.», «50 лет Вооруженных сил СССР», «60 лет Вооруженных сил СССР», «Двадцать лет победы в Великой Отечественной войне 1941-1945 гг.», «За доблестный труд в Великой Отечественной войне 1941-1945.»
КIине хIадад 27 июньди 1981 иса.
