Махачкалайин мэрди ахттилатар акьуне махьтабарин капитальный ремонт акьуна ккиркIубан вахттарихъас, кьайдабурихъас, ме кардин кьадмивелдихъас арайил акьу мегIракайил.Гьелбетта шиниккварин тарбия хIапай асуллу э дадаласна бабалас. Амма махьтабин, мегIелимдин тарбияра михъай барамбар э. Фас пучин, цIеса истти гьер  са шиниккв са пай ягъа аве махьтабиъ. Миштти идегуна, хье хIуькуматин вакилар алучIа хьудегьен ппара иджвелин шартIар алтухъ акьас мишттин гIилмин идарабуриъ.
Гьемиштти Махачкала шагьурдиъ 14 махьтаб ая, фикир йина батIар акьуна кканеттар. Ме кардихъас хабар акьуне информагентствойис шагьурдин администрацин пресс-службайи.
Ме гъургъубаригI иштарак акьуне шагьурдин мэрди Юсуп Умавова, гIилминра наукайин министрди Яхья Бучаева, усттавелдин пешакурарин вакилари, махьтабарин директорарира.
Мэрдин чIаларилди, 1-пе сентябрьди гIилмин идарабур джаллабур кардик кихьуна кканде. Амма батIар акьубан курар са – са махьтабариъ дала алгъатIубарихъди рукьуна адава. Сур махьтабариъ хъара алтухъан курара бадил хьуная. ЦIае усттабурихъай икьрар хъитIуб бадалди вахтт кканве.
Ме мегIракайил агвар акьуне алтухъан курар бадил хьу махьтабара. Пешаккурарин чIаларилди, ме кар асуллу э хъитIу икьрарар куьгьна хьубалас. Фас пучин, икьрар хъитIуная 2021-иса, дехIела ягIайин ягъас ме курарин мегIна чIукь хьуна ая. Ис исал рукьудегьен лазим иде курара цIае вей духIуба ве.
Юсуп Умавова тапшурмиш акьуне ме курарил батIарди алгъузуб. Гьер са джигагь фиштти арайил аркьайчин уликк ухI пуне.
МегIракайил хъара усттавелдин пешакурарис насихIет йине чиппин курар алийи вахттунис хъучархьуб бадала бригадабуриъ усттабур алтухъ акье пуна.

Салихат Малагусейнова