740 агъзуралас вартт туристар адиная Дагъусттандиди ахиран ерхьи вазалан арайи, ме 10% вартт э алттушу исалас. Ме ахттилатар ахъакьуне Сергей Меликова кIили гъая мегIракайил РДйин туризмайинра хъара народный художественный промыслабурин министрди  Эмин Мерданова.
«Садпе ерхьи вазала Дагъусттандиди адиная 745 агъзур инсан, ме 10% вартт э алттушу 2022-пе исалас. Туризмдин сферайиъ кар аркьая инсанар ппара хьуная, 11 агъзурахъ хъучархьуная. 1-пе июльдис 2023-пе исан агьалдин вахттунис ахттигьар фай кар аркьая 49 туроператорарна 76 турагенствабур, 89 экскурсибур аркьаттар», — пуне ведомствойин хIатти.
Авалалас Дагъусттандиди гьер регионариас алттвере самолетарин рейсар ппара хьуная, миштти идегуна, вере туристарин сан ппара ве», — пуне Мерданова.
Хъара пуне ми, 13-пе июльди Махачкалайин аэропортуниъ кьабул акьуне садпе самолетин рейс Nordwind Airlines  Ульяновский областиас.
«Ульяновск – Махачкала Дагъусттандинра джуре регионарин семехьи аркьа рейсарикес 14-пеф хьуне. Миштти идегуна, Дагъусттандиди вере рейсарин сан алттушу исалас  удтти вартт хьуне», — пуна ахъакьуне министрди.
Мерданован чIаларилди, ади инсанарис эркьва мукьар Дагусттандиъ аяф 85% инсанарис э, дехIела агьал алучIуная эркьва мукьар ппара акьас.
«Агьал ая ке лазим иде курарикес садпеф э туристарис цIае эркьва мукьар арайил акьуб. Ме кардихъас, гьеме вазала Дагъусттандин Минтуризмайи акьуне бехIсарин мегIрака ме джигагьар гъадивуна арайил акьубан», — пуне Минтуризмайин хIатти.

Луиза Гусукаева