ЯгIа, 12-пе августиъ, Дагъусттанди акьуне Кьулбандин хIаягъ. ХIаягъ аркьафе зульхIиджрайин 10-пе ягъас. Ме ягъа мусульманари аркьа мубарак хIаягъ. Хье райондин хIаттира агъуларин хIалкьдис акьуне мубарак Кулбан-байрам.

ХIаягъан кьулгун акьухаб руккафе Кьулбандин мал. Мал руккуна кканефе бегьем хьуна инсанди, учин амурди аятти. Мал уч Iаттеф-бурIеф хьуна ккандава. Руккас ахтеар ая хIуппара укьарар са ис хьунаттар. ХIа малра, чIаран малар руккафе Iу ис хьунаттар, деве – гIифу исра хъара вартт.

Рукку малдин якк аркьа хьибу пай. Са пай эесис арта, джуре пай ицIанде касибарис, хьибуд-пе пай – къуншибурисра багунттарис.

ХIубна чIаран мал са инсандихъас вейчина, хIа мал ерийихъас Кьулбан акьас верефе. Кьулбан аркьафе бегьем хьу инсандихъас. Рухай аметтихъас аркьафе хIакьикьа.

Агъул райондиъра ппара ухьтанди аркьа хIаягъ. Ме исара джемеIети руккуне ппара малар. Эеси учин паюкес алчиланде хIуьяг гIихьуна яккар хIаягъас агьиянас.

Хье гIедатарилди унахъугуна дала вейдава хIаягъ мубарак акьас. Яккар руьхьуьгуна дала ун дархъаф суман. Амма Рамазандин вазала суман ун дахъучира вес ахтер ая хIаягъан къулгунар  акьухаб. Шиникквара гIаруца ме ягъа чантабура фай иттеттар завал акьас.

Сиварин вазалан хIаягъалас ме хIа э. Кулбандин хIаягъ аркьафе якьу ягъди.

АцIунабири раккаригь ккийина уйи хIаягъ. Миссиарин хуриъра акьуне гиштти.

Ппара ая агъулар диндиъ аяттар, гьер иса вереттар аве хIедждалди. Ме исара ушуна ая хIеджибури Меккайиас мубарак  акьуне Кьулбандин хIаягъ джалла агъуларис.

 

К.Мирзоев