Махмудова Галимат Гаджиевна хуная 3 декабрьди 1956 иса Гехъуьнарин хIуриъ Агъуларин райондиъ. Ге э са гIеджиз хизанарин руш. БицIигунан Iуьмур гин ушуная лиханди, кумак аркьай учин дадасна бабас, ухIуна хIа акьас учин чиярна чуппар. Авала са хулаъ  авейи ацIуна хизанар, гебурин дуламиш хьас бицIиф, хIаф дагъай кар акьас хъучикайи, гьерттифас фи агърукьайчин, гьете кар аркьайи. ХIа къалин хизан ухIас ппара четин вейи. ГьуркIуна Iеле гуниракегьей фун ацIасттегьен фачархьай давуйи.

Ерхьи ис хьехаб ушуная ХIелимат хурас Гехъуьнарин махьтабиди. Махьтабиъ ХIелимата дарсар хурай хьуная иджи. БатIарди зигьин фая руш хьуная ге. ЙицIудпе класс хуруна ккиркIухаб, ушуная ге хурас Дербентское педагогическое училищейиди. 1977 иса хуруна ккиркIуна ге училищера адиная ХIелимат хаб хIуриди кар акьас. Хабди 20 истти кар аркьай илгуная ге хIуриъ.

ХIелимат Гаджиевна ппара идже мегIелим э. Ге махьтабиъ ая бицIи шиниккварис ппара кканве. Гебурин дадар-бабарисра кканве ге мегIелим, иджи дарсар ирцIанхIела чиппин шиниккварис. Ппара Iайи юркI алди шиниккварил ирцIанде ХIелимат Гаджиевнайи учин дарсар. Гисра ппара кканве учин шиникквар. Гьер джурайин дарс йибан Iемалар ишламиш аркьа ги учин дарсариъ, шиниккварис тамашилди агвас учин дарс, батIарди юркI алиянас дарсунил.

АцIуна исари ХIелимат Гаджиевнайикес махьтабиъ хьуная руководитель МО бицIи классарин. Учифас агърукьа кумакра аркьай хьуная ги джигьил адиная мегIелимарис. ЯгIар аркьай хьуная ги гебурис шиниккварихъай фиштти гъургъайчина, фиштти иджи ичина дарс йин, шиникквар гъавурдиъ архьагъилди. Уч кар аркьаядегьен гагьди ХIелимат Гаджиевнайив ягъди фаяфе кружковый кар. Гин кружокариди ппара шиникквар ве, фас пучина ппара тамашилди ги гъарехIела учин кружокар. Гив фая кружокар «Умелые ручки» агъаттар. Ге кружокариъ ппара батIар тамашин задар аркьа шиникквари гихъай. Пластилиникес, бисердикес, хаятIикес, ттуникес, кIураникес,  хъара гьер джурайин шейэрикес гебури даркьа задар адава. БатIарди иджи дарсар гъарехIела ХIелимат Гаджиевнайис йиная звание «Отличник народного образавания» агъаф 1992 иса.

20 иса кар акьухаб, ХIелимат Гаджиевна ушуная хурас ДГПИйиди, бицIиттарин классарин факультетиди. Гевус хуруна ккиркIуна 1994 иса адиная ге хаб учин хIуриди махьтабиъ кар акьас. Хабди ХIелимат Гаджиевнайикес са-Iу исари  хьуная завуч по внеклассной работе. 2015 исалас мич ге э технолог Гехъуьнарин махьтабиъ. Технологира ги ппара тамашилди шиниккварис ирцIанде. Гик кидава пеша адава. Джала инструментарихъай кар акьас ягIа гис. Идемин пешабура кея гик. Учин кар иджи гъарехIела, гис 2011 иса йиная са звание сара «Почетный работник общего образования» агъаф. ХIелимат Гаджиевна э ветеран труда 2012 исахъас хаб. Ме дишагьли хуна, ухIуна хIа акьуная, дуьхьуьная са рушна са кIиркI. Гебура чиппис кканегъилди иджи дуламиштти ая.