Исан ахиран ягъари инсанар ппара чириш-миштти аве хIереакат аркьай гьер джурейин фикирдиъ ая курар арайил акьас. Джаллабурис кканди аве ЦIае исас алтухъ читинвелар ачадагъас. ХIуькуматин курарил алди аттар тегIди аве чиппил алди ая вазифа дузди акьуна алдихьас. Ме ягъари хIаттарихъай бицIиттара гIачIугъуна аве. мебурин ая чиппин вазифа. Мишттин мегIракабур аркьа садикариъра. Мисаъ аяф лап бицIи шиникквар э. Мебурис хъара ппара тамаш э ме хIаягъан шадвелар. Мисаъ чиппин нашивелди джаллабур хъугъуна гъузуна аве чиппилди аяз-хIадад савкьатара фай адисе агъай. Амма сагелай савкьатар пай акьастти, мебури ке бицIи группайилас башламиш акьуна хIаттилди рукьуна агвар аркьа чиппи хIезур акьуная сценкабур, лехъунар, аркьа мегIнибур, хура шаирар. Хабди чиппис йина савкьатара фай, шадтти ве джаллабур хулариди.
Миштти аве махьтабариъ аттара. Мебурин чиппин программа аве. Махьтабариъ хIа классариъ хурая шиникквари декабрьдин вазалан ахиран ягъари, дуьхуьна хIа джигахьр, башламиш аркьа хIаягъан мегIракабур. Мисаъ башламиш акьуна ке бицIи классилас хIаттилди рукьуна агвар аркьа лехъунар, сценкабур, аркьа мегIнибур. Ахирахъди мисаъ аркьа билетарин розыгрыш. Ме кардихъра ппара Iайи гъузуна аве шиникквар. КIур ихьай агъдива нумер кея кIеджар, шиниккварис гIаттархьа савкьатар. Ппара шадтти аве мебур чиппис фичира идже шейэр аттархьу вахттуни. Хъара хIаягъас бахш акьуна мегIракабур аркьа клубариъра.
Мисариъ аркьа тамашибур кедавай шиниккварис хулариъра хIезур акьуна аве джереттара. Агьалдин заманайиъ ппараттари ме хIаягъ бусулман халкъдинф дава агъай ши икквар вардиш аркьаттар ая, айчира аме алтухъ бицIи ами шиниккварин йиркIурак кирхIас дава, джалабуригIай мебурисра хьурай агъай валадар шад акьас алучIаттара. Дузди пичин ппара гъузуна аве шиникквар ме ягъахъ. мебурис мультикариас, хIикатариас аргва аяз-хIадада шиниккварис гьер джурейин савкьатар ирцIанди. ДехIела мебурин йиркIв хъугъа михъ. Лап дахи димари аве аязхIададас кIеджар илкIенттар чиппин йиркIураъ ая мурад хияларихъас. Шиниккваригьас джинди хуруна, бабари ме кIеджар гьикуная пуна аязхIададас, гъуршанде мебурис савкьатар. Хабди ме хIаягъан Iуьшуй, шиникквар гъархьухаб, кичикIа мебурин савкьатар елкайикк. Багами, гъайши арайи, шиниккварис ме сав кьатар агу вахттуни, йиркIвар шад ве, мебурилас Iайи шад хьуна аве хIаттар, мебурин гьава аргвай. Вахттар ккетвей шиникквар хIа ве, мебур гъавурдиъ архьа аяз-хIададар адаваф, чиппис савкьатар бабари гъуршанф идеф. Айчира чиппин бицIигунан вахттарин шадвелар кIвал аркьай, кIилин Iуьмурдис илгванде инсандис иджвелин фикирар. Хабди чаб хIавей, чиппис акьу тамашибур кканве чиппин шинникIварисра агвар акьас.
Хъара гIедат хьуная ме хIаягъас завариъ хлопушкабур агъатуб. Гьелбетта ме тамаш э, амма хIатIа багвра хIаф ая мин. ХIаттарира, алучIа гьертти учин валадис кканеф акьас. Удигь кIил чаб хьуна гъуланде гьер джурайин хлопушкабур, завариъ агъарта фейерверкар. Шиниккварира ягъар-вазар ккими башламиш аркьа фачархьу манат фай дуьканди вей гъушанас гьер джурайин хлопушкабур. Агьал дуьканариъра ая мебурин ери джуре. Шиниккварин чиппин арайиъра аве бехIс найихъ ппара хъайчин, хIаттар, Iайи бахъар аркьаттар, ун хъаттар, тамашингъилди чурхъаттар.
Тамашабур суман Iайвелара ппара кея мебурик. Шиникквари чиппин нашивелди, гъавурдиъ адавай, гъуланде хлопушкабур, амма хIаттарин вазифа э мебурин иджвел-Iайвел ахъакьас. Дуьканчибурив фахьуна кканде мебур масса йис ахттигьар ая кIеджар. ХIаттар хъудавай адина бицIиттарис мебур йина ккандава.
Гьер джурайин курар алчархьуттар, зарар ппара йиттар ая мебурикес. ЦIа кихьуна фадихьас хъучадархьуна гъиларигI чурхъуттар, тIубар гьадахъуттар, хулариъди ачархьуна цIабурар керхьуттар, IуькIеригI гIархьуна угуттар. Гьемишттин нехIс курар алчадархьас хьин алгъузуна кканде шиниккварил. Хуларигьас, саларигьас, мухIаригьас, хъара сасра инсандин джигагьаригьас вархалди гьайчIуна кканде мебур чурхъагуна.
Фиттихъди кканчира мугъатвел хъай тIуршай кканде фас пичин, нехIс вереф сагелай э.
Сасра багухъас хъуттрфучин, авала суман ме хIаягъ акьас алучIай андава инсанари. Ппараттарин хуларин хизанар ая агьал СВОйиъ, мебурис алтухъ тамашибур акавей адава. Джалла регионарин, шагьурарин хIаттарира хабар йиная сасра исари суман плошадарил хIа елкабур ихьасдава пуна, ме курарис ачарта манатар гьикасе пуне Свойиъ ая эскерарис. Халкьдисра ппара нуш хьуне ме ахттилат.
Луиза Гусукаева
