Дуьняин сакинвел ислехIвел гьер са инсандин матлаб э. Амма вахттар гIатвей фи багьана хьунара са бала гъайша хIуькуматин кIилил. Мигелайин бала э Украинайъ вея СВО. ЯгIара хье хIуькуматин сакинвел бадала дегIвиъ душманарихъай дженг дивай ая хье аскерар. Ме сандигI гIачархьуная хье агъул райондин джигьилара. Гьеме спецоперация хъучучIухаб ягъалас ягъа вартт вея санар ватан ухIас ушу джигьил аскерарин. Гьелбетта ме аскерарин джалгабуригI гIая игитар, зурбавелдин гьунарар акьу джигьил аскерар Дагъусттандис суман, кIилди хIуькуматиасра. Гьер са аскерди учин ватан бадала акьу загьмат амилгванасе багу-кIиларин, несиларин йиркIвариъ, мебурин Iуьмурдин тарих хьасе инсанарис. Гьеме санаригI гIая Агъул райондин гьер мукьариъ дуламиш вея джигьилара. Ме нубати гъургъасе ЧIаарин хIурин Iу ччуччухъас Пирдамна Рамазан Сафаралиеварихъас. Мебур Суфинра Сураятан валадар э. ЯгIайин ягъас Iудар чуппари иштарак аркьай ая СВОйиъ. Дадар бабарихъай дуламишди уйи мебур Магарамкентский райондин Казмаляр -Тагиркент агъа хIуриъ. Мидас махьтабра ккиркIуф ушуне ватандин удигь але бурдж йис армиди. Хабди армин вахтт ккиркIухаб икьрар хъитIуна илгуне. Сафаралиев Рамазан Суфиевич хунаф э 6пу июльди 1994 иса. Ке цIайи Рамазан икьрар хъитIуна служит аркьай хьуне Чеченский республикайиъ станица Шелковская агъа военный частуниъ. Ушу иса ме спецоперацигI душманарихъай дженг диваусаъ мин джандил хьуне ирхьунар. Ватан бадала зурбадалди гъузуна диву загьматарихъас Рамазанас йина уйи Iу джавизра. Сад э «За спасение погибавших» агъаф, сае «За храбрость II степени» агъафра. Сафаралиев Пирдам Суфиевич хунаф 28 пу июльди 1991 иса. Пирдамра икьрар хъитIуна служит аркьай уйи Нарофоминский танковый полкуниъ. Iудара чуппар чиппи икьрар хъитIу усариас разидалди ушуне Украинайиди, хъучучIу ягъанихъас хаб иштарак аркьай аяфе СпецоперацигI. Мишттин ватанперасвел хъай гъузу эскерар аме гагьди хье хIуькумат са душмандин удигьра хаб чукIа кар хьастава. Фидегьен азиятдалди хье эскерар ме СВОйиъ айчин, гебурис чиппис дала гьанасра ягIайдава. Дадар бабарисра пара хIа къакъ э чиппин валадар дегIвиъ ая агъа фикирдилас. Хьел гьертил але кар э мебур йиркIуралас гьадартай, джаллабур сагъ — саламатилди чиппин хизанарилди рукьурай пуна тIалаб акьуб.
Батитай Габибулаева
