БицIи-бицIи хьид багу вея. Амма хъел аде инсандин суман гъадарка хьидин гьава. Iурдана дахье суман руца мекIера кам вейдава, ягъан ягъа са джаран ибхьра угъа. Мишттингуна э агъаф инсанари хьид алахъуне пуна. Мал-къара хъаттарис ппара гIезаб кеве хьид алахъас гучIай. Фас пичин иджи кканегъилди ккерхъа IуькIера хъамилгвандава хьидихъди. АхъутIуна аве мус адикасегьан агъай малар байирди. Мал адикубасра кумак вейдава нагагь IуькI гьава дахьунахаб, сайиштти малар вере, Iеле суман аярариъра фера амилгвандава, фас пичин хулахъ хъудавай Iурдтти байирдиъ ухIа джемеIетин малари мертт акьуна IуьтIуна аве.
Амма фидегьен ибхьер угъучира хьидихъ инсанар ппара ахъутIуна аве. Iурдин микIил джикъе ягъар, мучIе ирхе Iуьшар алзийина аве инсанарил. Хьес шагьурдилас гьавайи ая хIурарис ппара дахи хъучучIа Iурдра, лап гьете цулихъас мич. ИдехIела хьидин ибгIа ягъарихъра ахъутIуна аве, дуьйин гьавара духIуба ве. Самуз далда кея мукьариъ бицIи гъазе IуькI агъучIас алучIа, элхIенди джиллар, хуппурариъ архьас хъучучIа бугъ. Музи-музи инсанар фачучIа ахъаджихIас бусттанарихъна багъарарихъ, мерттар аркьай цIабурар куьхьай цацан ерсе IуькIерик, гъурарик, хабди атай хъучучIа бер. Хьидана фи багьана хьунара вахтт фарта инсанари чиппин иде-даваф аркьай. Багами аттвей, лап гьете гIуьбехъин вахтт хьасттегьен адарка чиппин джигагьариъ. БицIи-цIури кар аркьай бизар вейчира, йиркIвра алттгъаре курара э мебур.
Гьава ибгIа хьугъилди хъучучIасе уьцIас гьавабуриъ ая ибхьер, нецIварил але меркквар, булахарихъ ахъадисе кканедегьен хьеттар. ИбгIайи ай аргвай инсанарира алайхьасе чиппил але къаркар: гьукк акьуна гьаттива Iурдин хъарцаттар, ибгIа кунар, лекар. Амма ме вахтт ке Iайи инсанар гъафил аркьа вахтт э. Фас пичин ибгIайи ай аргвай инсанари аликIас алучIа кIилли, хуппай гIаттве гьер джурейин итталар. Миштти дахьас хьидин вазар самуз мугъатти фартай кканде хьин.
Батитай Габибулаева
