«ХIуьлматлу дагъусттанагьлибур! Хье хIуькуматин тарихиъ 22-пе июнь ппара хIа мегIна хъая ягъ э! Фикир ухIубанра дардунин Ягъа хьес кIвал аркьа миллионарилди инсанарин Iуьмурар кьацIра аминдавай духIуба акьу гъамлу вакъиабурихъас.
Дузди 85-фу исан удигьай Германин фашистари са хабара кидавай хIуьлалди – залалди экьуная Советский Союздин джиларилди, халкьарилди гьуджум акьуне.
Ватандин ХIа дегIви хъучучIуне, ппара гIезабарна азиятар хьуне ме вегIдайи хье халкьарис. ЯгIа хьин икрам аркьа Ватандин азадвелна садвел бадалди чиппин Iуьмурар йиттарин Iекве фикирдис. ДегIви хъучучIуна садпе ягъари димари агъзурарилди дагъусттанагьлибур ушуне ватан ухIас. Джалла фронтариъ игитвелилди дженг дивуне хье миллатари, агвар аркьай чиппин идемивел, руьхIдин цIуппевел, Ватандис вафалувел. Гъалибвел гъушуттарин дженгерин абадайихъас гъургъай, йиркIурал дакьуна хьасттава Дагъусттандин зурба кIиркI Расул Гамзатован шиирин чIалар. «Чин къа миллион ая кIвалас давереттар, КIиттар, дегIвийин чуьлларилас дайдиттар. Дава, чин гулундава кьияматин кумаригI, Чин гъирхIу мукьарил, гумбатар гъузуне…» Ватан ухIай кIидегьен эскерари чиппин Iуьмур давам аркьа джемеIетин йиркIвариъ, хIуькуматин тарихдиъ, гьер са гумбатиъ, мехIелди, чиппин игитарихъас фикирарна хиялар ухIаттариъ. Мебурин гьунарар вахттар ккеттушучира йиркIвари хум гьатасттава, мус хьучира адабин тарбия хьасе кегъархьая несиларис. ЯгIа, дуьньяйил хабра читинвеларна, азгъун душманар гъамаз хьу вегIдайи, хъара цIуппи ухIуна кканде хьин хье йиркIвариъ тарихин дарсар, ислехIвел, цIуппе акьуна кканде хье ппара миллатар гIая халкьдин садвелна разивел. Гьаме ягъа хIа, дарин чугъсагъул пасе зун ветеранарис, тылдин труженикарис, дегIвийин шиниккварис, хъара хьехъди хье алттушу несиларин зурба гьунарар рукьас акьудегьенттарис. Абада фикир хье игитарис! Абада машгьурвел Гъалибвел гъушу несилдис! Фикир ухIубанра дардунин Ягъ хъучаверегуна Махачкала шагьурдин яIанин майдандил хьуне «Огненные картины войны» агъа акция. Ме акцин рамкабуриъ ай ишттаракчибури 20 агъзур дегьен шамарикес дегIвийин сюжет дахъуне – ме Гъалибвелдин Пайдагъ Российин Игит, СВО-йин ишттаракчи Абдулхаким Исмаилова гъадивубахъас. МегIрака арайил акьуттарин чIаларилди, ме кардилди мебурис агвар акьас кканхьуне Ватандин ХIа дегIвийинра гьалдин ватан ухIа эскерарин алакъа. МегIрака арайил акьуне РД-йин джигьиларин Министерство «Единая Россия» агъа партин Региональное отделениера хъай. Мебур аркьаяф «Историческая память» агъа партийный проектин рамкабуриъ ай э. ЦеремонигI ишттарак акьуне «Единая Россия» партин Региональное отделенин, «Молодой Гвардин», депутатарин, СВО-йин ишттаракчибурин активистари, молодежный объединенибурин вакилари, волонтерари, столицайиъ яшамиш вереттарина мисан гIуларира. РД-йин джигьиларин курарин министрдин врио Камила Саидовайин чIаларилди, мишттин акцибурихъ зурба мегIна хъаве, тарихин фикир ухIубан, джигьиларис ватанперасвелдин тарбия йибан рекъуьъ. «ЯгIайин ягъа хъара лазимвел ая джигьил несиларихъай хье халкьарин гьунарарихъас гьемиштти гъургъубарин. «Огненные картины войны» агъа акция — ме хье чугъсагъулдин ишан э Ватандин ХIа дегIвийин вахттуни хIуькумат ухIуттарис, хъара ягIа СВО-йиъ чиппин бурджи кIили гъареттарис. Мисаъ гьерса шамун Iекв –фикир, хIуьлмат, хъара хье джувабдарвел э nарихдин дузвел ухIубахъас», — пуне ме.
Салихат Малагусейнова
