Садпе суал гъадивуне мисал lекваринф. Алттушу lуьши Типпигъарин хlуьрин яlаниъ ая трансформатор угуная. Батlар акьубан курар кьабахъ ягъан абкьанин вахттунис ккиркlвасе пуна хабар акьуне.

Рекъерин курарин хабар акьуне: тегlде угъалар угъуна гъванар адахъу усар хьуная. Джалла багварихъ кар аркьая рекъерин пешакурари. Хъара гъванар ададиная Гъваарина — Фитlарин рекъуьн арайидира. Машинарис рекъ дахъуная, амма техника кар аркьай аме мисаъ.
Отдел образованира учин багухъас хабар акьуне. Мисеlети аркьая хlезурвелар хъучавея экзаменарихъди ЕГЭна ОГЭйихъди. ЕГЭйин математикайиасна русский языкин экзаменар хьасе хье райондиъ Типпигъарин махьтабиъ, сае экзаменар йисе ахтт ушуна. ОГЭйин экзаменар джалла райондиъ хьасе. ОГЭ ирцlан 91 шиниккв ая, ЕГЭ ирцlанттар 45. Джалла экзаменарис герек иде техника хlезурди ая.
Последний звонок агъа мегlрака джалла махьтабариъ хьасе 26 майди.
Хабди чlал йине УСЗНдин пешакурарис. Мебури хабар акьуне угъалари зарар йи инсанарис кумак акьуб бадала гlерзабурихъас. Джалла кей 1400 гlерза адиная инсанарикес. Мебури хъара пуне са садари гlерза ликlенгуна гъалатlар аркьа. Тlалаб э инсанарикес батlарди ул ачатуна дузди ликlиб. Хабди гъургъуне райондиъ хьу мегlракабурихъас. Дулдугъарин хlуриъ хьу мини-футболихъасна Типпигъарин хlурин мазгитаъ хьу маджлисихъас.

Закир Каидова тlалаб акьуне джалла идарабурин хlаттарикес гьер са райондиъ вея хlа мегlракабуригl ишттарак аркьай акье пуна.
Мисал хабар акьуне хъучадиная Зуль-хиджа ваз пуна, садпе ягъ алчархьая 18-пе майдил. 27-пе майди хьасе хье мусульманарин Кьулбандин хlаягъ.
Ме кар бадала хlурарин кавхабурис буюрмиш акьуне хlаягъа рукку малар хlуппарин кьудакьар фачархьу усариъ фаддахъас алгъузен пуна мерттвел ухlагъилди хlурариъ.
Джалла ме совещанил гъадиву суаларин буюрмишара йине.

Батитай Габибулаева