Гьавабур алахъу вегIдайи ппара читин хьуне хье халкьарис. ТIабиIетин завалар ппара гуджлу задар э. Мишттин бала — кьадабур са инсандисра дагурай. Амма хьин гьемиштти пучира, тIабиIетихъ учин къанунар хъая. Гьавайира хабарсузди учин гуджар агвар аркьа.
Ахиран Iу хIефттайин арайиъ хье Дагъусттандил ппара хIел адине. Сур усариъ угъалар, сур усариъ ибхьер угъуна. Аранарил хьед алгъархьуне, суварин мукьар ибхьери аккедивуне. Гьава районариъ ке дахи зарар вереф Iекварисна рекъерис э. Ке дахи кардик керхьафра ме пешакурар э. Фас пучин, ягIайин ягъас иджвелин шартIар алтухъ хьуна хIурин хулан курара джалла Iекварил э гъузунаф. Аме фера дахьучин Iари хьеттин кар хьурай, насос хъаттархьугъилди къабра кехIей Iуьччанас вейдава. Фикир акьучин Iекв хъаттархьугъилди хабар ве хьес, ахъихьас самуз кьана хьучин гиранра ве, амма ахъихьуна чугъсагъул хьурай загьмат дивуттарис пас кIвалра кехIей вейдава. Рекъерин читинвеларин кара гьемиштти э. Угъал, ибхь угъучира, хIа кулакар хьучира дембедан хатIа ве рекъерисра.
Хье варха райондис рекъер Iуьмурдин дамарар хIисаб э. Миштти идегуна ме кара хабди акьасе пуна атас вереф дава. Са чIукь гьава духIуба хьугъилди кьацIра мугьлат адавай лирханде ме идарабурин пешакурар. Мигелайра хIа ибхьиас агъавей адавей гьавабуриди, цIагъунар, синар хъучIирхIай ппара загьматилди арайил акьуне Iеквар. Вартталас угъайчира сакинвел адавай мерттар акьуне адахъу рекъер. Ме идарабурин пешакурарин вазифа Iари рекъер мертт акьуб, Iеквар батIар акьуб дава, кар аркьагуна чиппис хатIа дахьас эхIттиятра фахьуна канве, хабди джемеIетис хатIа дахьас кардин мехIкамвелра кканве. Дуьйин гьавайихъ хъуттудурфуна мебур гьерф учин кардин мукьуйил алхьуна кканве.
Са чIалалди Iуьш, ягъ дапуна мугъат хьуна кканве мебура найисаъ кIур, найисаъ Iекварин цIагъун алгъадаркуна айчин, найисаъ рекъ ккерчIуна, найисаъ гъванар адахъуна айчин гьаттивас. Зас пас кканде, Iекваринра рекъ еринра пешакурари фи кар аркьайчира, амма кьастт мебурин сад э — джемеIетин иджвел. Мебур е хIа гафарарихъра ахъутIуна авейдава, е хIа кьиматарихъра. Чиппилас асуллу иде кар, чиппифас аттрукьагъилди аркьа. Гьер са инсандин Iешкъ алдий кканде учин вазифайил. Гьемиштти, джалла сад хьуна йиркIв фай кар аркьугуна, джемеIетин чугъсагъулна разивелра рукьа мебурис. Чиппихъ гьемишанра сагъ джанар, ачухъ йиркIвар, гьалдинхабра кар акьас кьуват, хулан -хизандин арайиъ нуьхIуьбат, хIуьлмат, баракат кам дахьурай.
Салихат Малагусейнова
ишкилар: март 2026
