Исан гьер са вегIдайи учин кар дузди кIили файшуна кканде. Амма ме кар инсанарилас асуллу дава. Хьес миштти кканхьучира тIабиIетихъ учин Iеламатарна караматар хъаве. Мин ахттигьар э Iурдана ибгIавелар хьуна. Хьидихъди ибхьер угъубра. Е дахьучин джурегъилдира.
Сур исари мертти къурах ве. Алттушу Iурдана алтухъ ибхьер угъундава. Хабди хьид алахъуне. Аязари ругъас акьуне кIурарин тукар, узу мехIсулар. Ичира тIабиIет сакин дава.
Ахиран хьибу якьу ягъан арайиъ аме исари кIилин Iурдари дугъадегьен ибхь файдине. Ппара читин хьуне мал къарайисра, багъ — бусттандисра. Амма хъара читин хьуне ке Iайи Iекварихъас. Къекъе ибхьер алийина гьер усарилас кьатI хьуне сувариъ Iекварин синар. Угъая хIа ибхьериас хьибу ягъди агъавей адавей ппара азиятилди батIар акьуни хье Iекваринра рекъерин пешакурари. Хьидин ирхе ягъар ичира рагъуфас гудж алийина уцIас акьас вейдавуй. 
Дагъусттандин кIилин шагьурарна хIурара ая хьетти аккедивуна. Ппара зарарна хIатIабур хьуная инсанарин хуларис, шейэрис, мал – къарайис. Амма хье джемеIет зурба йиркIваринф, цIуппе руьхIдиф э. Гьемишттин читинвелар алчархьу вегIдайи джаллабур сад хьуна кумак акьас алучIа мебур. Хъара нуьхIуьбатна хIуьлмат кам дахьурай хье арайиас. Самуз эхIттият акьуна кканде шиникквар хьеттаригьди машинаригьди гьучадавес. ХIа хатIабур, зарар йиная рекъерис. Ме рекъер батIар аркьаттарисра ппара читинди аве. Кьуват йирай хье пешакурарис чиппин вазифа кIили гъас. Хьес йи гьер са пайунил хьин гьелбетта рази э. Миштти ичира, хьучин хьес кканде муфиIетин музе угъалар, алтухъ хIа дава ибхьер. ХатIабур зарар сайисра дагурай. Сагъвелна йиркIварис рехIетара кам дакьурай.
