Харалчикна келагъан,
Чун хумбарин дамакъ э.
Абур асул дишагьлин,
КIилил але ягълукъ э.
Гьер вахттари гьер джуре,
Пешакурар ай хьурай.
Гъили акьу наз-назихъ,
Сачах, цIимил хъай хьурай.
ЦIае сусан ишанигI,
Хьейин ягълукъ гIай хьурай.
КIиркI хIа аркьа хизандис,
ЦIакIинин ягъ агурай.
Хизан арайил хьугуна,
Шадтти ягъар ушурай.
Валадара хIа аркьай,
Бахттлу Iуьмур файшурай.
Тарихди мус хьучира вахтт гIартай тикрар аркьафе учин кар. Исар гIаттвей гIедатарна Iуьмурдин шартIара духIуба ве. АликIа кунар лекарин кьайдабура джуре ве. Авалдин вахттари джалла дагъусттандин шиберил, хумбарил алверефи ирхе кучарар. Фас э пучин, те вахттари алтухъ кьатI аркьафттавуй чIарар. Алахъуная ирхе кучарар нае вахттуни хьучира дишагьлин абур хIисаб аркьафе.
Хьибу-якьу ис хьасттегьен, хизан къалинттари ери-муя ис хьасттегьенра кегьей аларкьаф и шиберин кIилар.
Сури кIил алакьуна мег алми артафи ягълукъ хъайтIугуна чIарар алдеяф суман агвас. Са руш хъая хизанари сагелай — Iугелай алакьуна сара кирхIайдавуй рушан кIилик. Ме кар асуллу и бабас кураригьас мугьлат адававел дилас, мебур хъучархьайдавуйи Iуьччуна ахъаджихIас. Ирхе аркьайи шиберин чIарар гебурифас чиппин кIил Iуьччуна джирхуна арайил акьас вере вахттунилас тич.
Хье хIабабарин ахттилатар кIвал акьугуна, чIарар кьатI акьуб хIисаб аркьафи ппара Iа кар. Ме кар акьас ахттигьар уйи ярс дивая чиярис. Миштти идегуна и джалла авалдин дишагьлибурил ирхе кучарар алвереф.
Кучарара аркьафи гьертти гьергъилди. Сайи ярчIуд, сайи цIеIуд, са ппараттари къад, къайилас варттра чиппин чIарарин къалинвелдихъ хъуттурфуна.
ДжуьмIе ягъа Iуьччуна кIилра верефи шибер къучмабурилди, гебурин кумакилди аркьафи кучарар. ЧIарар цIуппе хьас, рекIв ичас, гIаджирхас рехIет хьас атафи чIарарис хъуь хъе ччам. Бурма чIарар кканхьугуна аркьафи музи-музи ппара кучарар.
Хабди, гьалдин вахттарихъди, акьуна е багухъас, е яIаниас IатIубра аркьайи Iу куч. Хуппай мебурикес тичмич ккедикIай аркьайи гуг. Агьалра кехIей бицIиди яш хьу суман хумбарихъ хъуттурфучин мебури аркьай аме гьемишттин гугар.
Хабди са вахтт хьугуна чIар ккедикIуна аруцас кевейдавуй дишагьлис. АликIуна къучра джин аркьайи чиппин кучарар. Фиппур пучира кIеб ягълукъ дишагьлийин адаб э.
КIилил ягълукъ але хумбеф ухшар ве. Мебур пучира гьелбетта инсанар вахттунихъай лек афишина аруцунара кканве.
Салихат Малагусейнова
