Ме 2026-пе иса Дагъусттандин 105 ис хьуная микес Дагестанская Автономная Советская Социалистическая Республика акьухаб. 1921 исан 20 январьди джалла Российин Центральный Исполнительный Комитети кьабул акьуне Декрет ДАССР агъаф.

Арайил акьу карди ппара хIа духIубабур файдине Дагъусттандис, халкьди гIаттивуне садвел Российихъай. Дагъусттандин хIаттин Сергей Меликован чIалалди ме 20-пе январь хье республика хIуькуматин кьанунилди цIуппе акьу ягъ э. Дагъусттандин хIатти кIвал акьуне, хье хIуькуматин хIаттин Владимир Путинан указилди ме 2026 ис Российин миллатарин садвелдин ис э пуна арайил акьунаф.

«Зас ягIа, хьин джаллабур алучIасе, хье джигьиларис чиппик кея идже пешайин курар герекверегъилди учин ватандиъ», — пуне Сергей Меликова.

Дагъусттандин Правительствойин Председательди мубарак аркьаусал ппара фикир йине фидегьен гьер джуре тарихар хъая пуна хье Дагъусттандихъ. Абдулмуслим Абдулмуслимован чIаларилди авал заманайи алчархьу читтинвелари хье дагъустанагьлибур джурейи садвелдихъди багу акьуне. Премьер-министирдиппара хIа чугъсагъул пуне СВО-йин ишттаракчибурисра, чиппин багухъас абурлувел хъай дженг диваттарис ватан бадала, авал заманайи чиппин хIададарин чишнайилди. Дагъусттандин парламентин спикер Заур Аскендеровара учин багухъасра пуне, ме автономия хьуна Дагъусттандис ппара идже хьуне: мункинвел хьуне аккуьшу хулар-мукьар ккегъдивас, дуьйис арайил акьас чиппин культурара. Ми йиркIурал акьуне Российихъай садвелдин маслихIет хьуф 1921 исан кьанунин актунилди дава, милатарин чиппин кьасттунилди э, миштти идеф дагъусттанагьлибури агвар акьуне гьете читтин 1990 исарин вахттари.

Дагъусттандин 105 ис мубарак акьуне Дагинформдин хIатти Арсен Юсупова. Ме учин багухъасра пуне, ДАССР хьуб ппара хIа тарихдин духIубабур э, хъара региондин экономикайинра. Мин фикирдилди гьеме ягъ хьуна кканде ке хIа ишан хье гьер джуре милатарин республика авадан хьубан. Хъара мубарак аркьаттари пуне сагъвел, нуьхIуьбат хIуьлмат хьурай пуна гьер са дагъусттанагьли хизандин арайиъ.

Батитай Габибулаева