БРИКС-дин хIатти гьучихьуне Дагъусттандиъ халкьарин садвел бадалди конференция кIили файшуб.
БРИКС-дин халкьарин форумдин президент Пурнима Ананда, Петербургский международный экономический форумдил, Дагъусттан Республикайин стендихъ хъуттурфуне. Ме стендин экскурсия мис акьуне Дагъусттандин Правительствойин Председательди Абдулмуслим Абдулмуслимова. Пурнима Ананда учин Iешкъ агвар акьуне Дагъусттандиъ БРИКС-дин конференция акьас кканде пуна, хъара ке удигьай ул ачатуне региондин хIурин магIишатин курариъ:
«Зун ппара шад хьуне чун хIурин магIишатин курарис майил ирцIанф ягIархьугуна. Фас пучин хIурин магIишат инсанарин Iуьмур э. Хьин ке удигьай ме отрасльдиъ ул ачарта. Ппара идже кар э Дагъусттандиъ, кIилди Российиъра ме отрасль авадан акьас научные технологии ишламиш аркьаяф. Ппара хIа чугъсагъул хьурай чвас ме кар бадала», — пуне Пурнима Ананда.
Абдулмуслим Абдулмуслимовара чугъсагъул пуне мис РФ-дихъди мин дусттвелдихъас, хъара гIалашуйвелди шаб пуне Дагъусттандидира. Россия — суверенный хIуькумат э, сайиласра асуллу дава ме. Ме кардин шегьид че экономика э. Чишна э, авала чин тIибитIаринна емишарин кьаламар Европпайиас гъуршанди ичин, ягIайин ягъа чин чиппи че республикайиъ кьаламарин питомник арайил акьуна хъучарта мебур Iари Дагъусттандисна Российис ваъ, хъара постсоветский хIуькуматарисра.
Час кканде че ватан, че халкь. Чвас ппара чугъсагъул хье алакъабурин дусттвелдис, экономикайис, че Президентис ирцIан майилдихъас, — пуне ме.

Салихат Малагусейнова