Сергей Меликова Владимир Путинас Дагъусттандин социально-экономический аваданвелдихъасна СВО-йин эскерарис ирцIан майилдихъас ахъакьуне.
«ЯгIа зун ахъакьуне хье президент Владимир Владимирович Путинас, фиттилди яшамиш вечин Дагъусттан, фишттин агалкьунар хъайчин, фи курар арайил акьас амичин. Гъургъуне ке лазим иде курарихъас — инсанарихъас, экономикайихъас, иджвелихъди духIуба хьу курарихъасра. Хьес джаллабурис ягIа фидегьен йIиркIурас багьа ичин президентин Дагъусттан. Ме лап цIуппи алакъа акьуне хье республикайихъай 1999- пе исан вакъиабури — ме хье джаллабурин тарихра э, джаллабурин гъалибвелра. Ме кар аргва гьер са ахттилатиъ, лап йиркIурастти фикир аркьа ме хье республикайин аваданвелдихъас, мус хьучира хIезурдира аве хье проектарис майил акьас. Зун ахъакьуне Верховный Главнокомандующийдис СВО-йин ишттаракчибурисна гебурин хизанарис ирцIанди ая майилдихъасра.
Сифтта кIилиас мич хьин алучIа багулив хьас: 41 агъзур тоннайилас вартт гуманитарка гьикуне, техника гъуршанде, кIилди снаряжение, са чIалалди Гъалибвелдис лазим идее — даваф джалла арайил акьас алучIа. Хизанарис майил ирцIанде: выплатабур, льготар, лазим иде усаъ джуре кумак аркьа са чIалалди мебурин IуьмурдигI ишттарак аркьа гьер са суал хIел аркьа мегIракайигI. Хулади адиттарис ислехI Iуьмурдиъра чиппин мукь джикIенас кумак аркьа.
Хье республикайиъ арайил алдея ме кар авадан акьуб бадалди «Доблесть гор» агъа программа, гьемиштти ери ишттаракчи чиппин йиркIурас нуш иде курарин эессибур хьуная.
Дагъусттанди ахиран гIуьфу исан арайиъ социальная — экономикайин джалла рекъерин аваданвел алтухъ акьуная. Дахъуная 12 гьалдин цIае джурейин промышленный предприятибур, 111 махьтабар, 97 садикар дахъуная, ремонтар акьуне 374 махьтабиъ, 63 детсадар, цIайи гъадивуная 122 ФАП-ар, 329 здравоохраненин идарабур батIар акьуная, медорганизацибурис 3 агъзуралас вартт цIае оборудованибура йиная. Гьер иса цIае рекордар алихьа аграрибурин агалкьунарихъасра ахъакьуне президентис. Алттушу иса 295 агъзур тоннайихъ хъучархьуна завал акьуне емишар. СКФО-йин регионаригIас Дагъусттанди ке хIа мехIсул завал акьуне. Чефас аттрукьуне цIае кIилиластти ккийина цIуппи лекул гъурзар акьас хIурин магIишатин ке идже рекъерикес сад — ме рекъ э виноградарство.
2025-пе иса 1980-пе исарихъас мич ахттармиш акьугуна ке ппара завал акьуне тIибитIар — 302 агъзур тонн. Владимир Владимировичахъай ахттилатаригIди хубджи джуре суаларихъасра гъургъуне — хьеттарихъас, туризмдихъас, ТКО-йин курарихъ фиштти хъучавейчин, рекъерихъас, архъа хулариас инсанар куьч акьубахъас, спортин аваданвелдихъас, культурайихъас, джигьиларин тарбияйихъас. Сур мукьариъ хъучучIуни мертте кIеджулас, сур мукьариъ ахъу усар аттивас алчархьай уй. Амма зарбунди хъучучIуна ая, гъурзар акьасра йиркIвариъ адава.
Гьелбетта гъургъуне читинвеларихъасра. Ке удигьай мебур э Iекварин читинвелар. Куьгьна хьу синар батIар акьубарихъай, цIайи дивуна кканеттара аве — ме курар арайил акьубан рекъуьас Российин лидераригI гIая хье республика. Аркьая рагъунра кулакин станцибура, ве хьехъди инвесторара. Гьемишанди суман мегелайра гьер са суалис майил джикIине хIуькуматин хIаттин хъуьсуйиъ. Ме кар бадалди ппара хIа чугъсагъул хьурай учис. Президентис хьин агъаттар унихьа, хьес майилра ирцIанде, эхIттибра хъая хьехъ. Ппара суалар исарилди гъадивай авуйттар ий, ахира але мукьуйилас тIушуне, ягIа багагь хIелра акьасе. Ме кардикес хабар хьасе Дагъусттандин гьер са хизандис. Джалла дагъусттанагьлибурин ппаттаас сагелай сара баркаллагь пас кканде зас Владимир Владимировичас, хье республикайис ирцIан фикирдихъас, гьеммишан аркьа кумакихъас. Ме карди хье Iешкъ ихьа хъара агалкьунар акьас», — пуне Сергей Меликова.
Салихат Малагусейнова
