Инсан!
Яраб фи фикирдилди, ниятилди халкь акьуф эгьан ме. Джан але задар ппара яратмиш акьуная тIабиIетиъ. Амма дуьньяйин варттал аледегьен джан але задарикес ке гуджлура, Iекьуллура инсан э. Гьер са инсандин Iуьмурдин рекъ уч хастти ликIина авейчира, сур мукьаригI инсанди учин духIубавелара гIачихьа. НехIекьдидава агъай вереф Iуьмурдин кьадарилас инсандин фигIил алтухъ э пуна. Гьер са инсан гьер пешайин эесси э. Сайикес ве мегIелим, сайикес ве духттур, сасрайикес устта…
Гьелбетта пешабура ппара ая. Зас ягIайдава инсанди пеша эв джиркIенф, е дахьучин пешайи инсан эв? Амма са кар зас хIекьдандира ягIа. Пешайи инсан дава ухьтан аркьаф — инсанди пеша э! Вахтт адина пешайин эесси вере вегIдайи гьерттис учис хъуьдуьхьуь пеша джиркIенде. Гьеме кар ппара идже кар э. Фас пучин нагагь пешайис инсан, ера инсандис пеша хъуьдуьдуьхьуьхаб кIилдибурин курар чIир хьасе. Учи аркьая кардил Iешкъ алдий, лихун ккане инсанди, йиркIв фай кар акьуна багайин ягъа диву загьматикес джемеIетис иджвелра хьасе. ЯгIа хьин гъургъасе джалла багварис иджвел кей Iуьмурдин рекъ гъаре дишагьли иде Омарова Сабират Габибуллаевнайихъас. Сабират Омарова са агъзурна ерчIу вершна гIуьфцIурна ерчIудпе иса Агъул райондин Бедухъарин хIуриъ Габибуллагьна Байранкиз Омароварин хIа хизандиъ хуне. Мебурин хизандиъ ай уй муя шиниккв, ери кIиркIна са руш.
«БицIи Iуьмур зе ушуне Бедухъарин хIурин мертте гьавайил, ухьтан гъазе тIабиIетил. Дад зе Омаров Габибуллагь тарихдин дарсар ирцIан мегIелимра ий хъара шаир классикра. БатIар шиирар лиркIенф и ме. Баб Омарова Байранкиз кIилин Iуьмурди хулан кайвани ий. Гьелбетта кайвани пугуна ме Iари хулан кар давуй аркьаф. Хал ацIу хизанар, сал ацIу малар байирдин калтуф, гIуькIра бицIи — цIури шиникквари гъил гьучихьучира мин гардандиъ авейи. Махьтабиъ йицIудпе классиъ хура вахттуни че хизан айчIуна куьч хьуне Каякентский райондин Дружба агъа поселокдиди. Ме ис и агъзурна ерчIу вершна ерцIурна ерхьидпеф. Мич ушухаб зе бабас бицIиди рехIет хьуне. Мисаъ хуппурар гIарар алтухъ адавуй», — ахъаркьа Сабират Габибуллаевнайи.
Махьтаб ккиркIуна са агъзурна ерчIу вершна муйцIурпе иса фельдшервел хурас ушуне ме Ростов на Дону агъа шагьурдиди. Хуруб ккиркIуна адехаб джемеIетин баркаллагь хъай кар аркьай хьуне духттурвелди Дружбайиъ. Са къа исан удигьай айчIуна ушуне Сабират Москва шагьурдиди. Мисаъ хаб хуруне РУДНдиъ провизорвел. Хуруб ккиркIуна ягIайин ягъара кар аркьая фармацевтический компаниъ. Учин аркьа кар ме аркьа йиркIв фай. Кардигьас азад вахттуни лиркIенде шиирар. Шиирар лиркIенде учин ху агъул чIалалдира, Iуьрус чIалалдира. Ме пай мис зе фикирдилди дадан багулихъас йиная. Яратмишарин бажаранвел инсандис тIабиIетин багулихъас ирцIан хIа савкьат э. Яратмишарин дакьикьа гьер са инсандин руьхIдин сир э. Ме карди гъа инсандис йиркIуран шадвел, гIилмин гьававел, руьхIдин сакинвел. Са чIалалди мишттин дакьикьа абада э, е дахьучин авалдинра хабдин вахттарин арайиъ вахт гъурзар аркьа дакьикьа э.
«Дад кIихаб адихьуне зун зе дадан китабар: “Аманат”, “Че Агъул” агъаттар. “Аманат” агъа китабик кея зе шиирара», — ахъаркьа ме. Iуьмурдин кьадарилас асуллу хьуна хизанра хъудай Iуд валадар ухIуна хIа акьуна тарбия йина Iуьмурдин рекь агвар акьуна пешайин эессибур акьуне. КIиркIахъ учин хизан, хьибуд шиникквара хъая. МГГУуйин горный факультетиъ хуруна гьеме рекъуьас кара аркьая. Рушахъра учин хизанра якьуд шиникквара хъая. ДГПИйиъ хуна, ягIа учин бицIи суман пеша хъая. Сабират Омарова ппара тамашин дишагьли э. Iеламатинф даваттифас мидегьен курар са чанг дегьен Iуьмурдиъ арукьас акьуна кIили гъас хьасттавуй. Учихъ гьалдин хабра курар давам акьас джандин сагъвел, кьуват, руьхIдин цIуппевел хьурай!
Салихат Малагусейнова
