Махачкалайиъ 14 марти, М.Горькован ттуранихъ хъая, Русский драматический театрдиъ, хьуне мегIрака. Мисаъ йине чиппин разивел фай ушуная «Каспий» батальондин ишттаракчибурис госнаградабур. Ме мегIракайин кIил файшуне Дагъусттндин хIатти Сергей Меликова. КIвал акьасе, «Каспий» батальон арайил акьуф республикайин хIаттин маслихIетилди 2023 иса э. Миштти батальон арайил акье агъай тIалаб акьуне хIаттикес гьер джурейин общественный идарабури. Джавизар ирцIан вахттуни, дагъусттандин хIаф бахилди гъургъуне ишттаракчибурин зурбавелдихъасна игитвелдихъас.
«Зун ппара рази э хьефас мидегьен зурба идемар саусал завал акьас хьеф. Амма джалла джавизариласра чIаларилас чвас ке хIа джавиз э инсанаринра, шиниккваринра, багу-кIиларинра баркалагь. Хъара, фиттихъас э хьин мидегьен загьмат диваяф — Гъалибвелдихъас!» — пуне Сергей Меликова. Ми кIвал акьуне агьал ая Курский областиъ операцихъас. Кьанди Владимир Путина пуне ме операциъ ишттарак аркьая 117-й отдельного гвардейского полка морской пехоты Краснознаменной Каспийской флотилихъас.
«Чин ппара рази э джилилра, завариъра, хIуьлилра Ватан ухIаяттарил» — пуне Сергей Меликова ме мегIракайил.
«Хье Вооруженный силабурин зурбавелди кумак аркьа валаятис фишттин душман хIевалат хьучира зурбадалди гъузанас»,-пуне хIатти.
Сергей Меликован фикирарилди, авалдинра, гьалдинра, хьасмиде вахттар са усал аркьая «Каспий» батальондин йиная боевой знаменя алттушу исан октябрьдин вазала.
«Ме знамяйилди хье дадари, хIададари аркьайи лап хIа гьунарар, ухIайи валаятин сакинвел. ЯгIа ке Iайи читин усариъ «Каспий» батальонди лиркIенди ая игитвелдин тарих. Зурбадалди гъузуна чваал алийная вазифабур аркьая чун. Ппара нушди э ягIа чвахъас иджвелин чIалдала ундихьаяф», — пуне республикайин хIатти.
Ме чIаларин дузвел хьес аргва мебурис йиная джавизарилди, орденарилди, медаларилди ме ягъа 37 военнослужащийдис. Сергей Меликов гъургъуне шаир Алесандр Твардовскийдин чIаларилди: «Хунухиас игитар верефттава, игитар вереф дегIвиъ э».
Ме чIалар хъуьдуьхьуьна ая Магомед Алиевас, Бегмирза Мохоевас, Сергей Сабановас, мебурис йиная орден Мужества. Республикайин хIатти баркалагь пуне мебури дива загьматис ватандихъас. «Чве игитвелна зурбавел час джалабурис чишна э. Чун Iари ухIуфдава хье джилар чун джалабурис агвар акьуне ватанперасвел», — пуне Дагъусттандин хIатти.
Хъара баркалагь пуне ротайин командирарис Хабибула Халимовас, Эльдис Минатуллаевас.
«Зас ягIа фиштти ичин командирдин кар. Фидегьен хIа джувабдарвел алдийчин гъиликк ккея эскерарихъас. Гьер командирдин вазифа э учис йиная буюрмиш акьуб амма ппара Iайи алучIуна кканве мебурин Iуьмурара ухIас», -пуне Сергей Меликова.
Ме мегIракайил кIиттарихъас са дакьикьайи буIуна мебурин хIуьлмат ухIуне.
«Зурба игитарин ттурар, чиппин Iуьмур хIейиф дакьуна валаятихъас йиттарин илгванасе джаллабурин йиркIвариъ. Мебур Вугар Азаевна Батирхан Кубиев э. Мебурис Президентин Указилди йиная Мужествойин орденар. Баркалагьдин чIалар пуне мебурин дадар бабарис, мебур ухIуна хIа акьуна идемар акьуттарис», — пуне Сергей Меликова.
Сергей Меликова хъара пуне, ягIа батальон «Каспий» гIая КТОйин ишттаракчибур, воины афганцы хъара джуре усарин дегIвибуриъ хьуттара.
«Чун джаллабур саусал аркьаяф «Каспий» батальонди э. Джалла чвахъай аяттарис саламар фачи. Сагъвелар хьурай чвасра чве хизанарисра. Гъалибвел хьеф э», — пуне мич завал хьуна аттарис региондин хIатти.
Ме ягъа джавизар йиттаригI гIуйи «Каспий» батальондин командир Табир Маликов, мин помощник «Терек» бригадайин командир Алексей Гасанов. Мебурис Сергей Меликова йине медалар «За проявленное мужество».
Табир Маликова учин багухъас чугъсагъул пуне республикайин хIаттис ми аркьая майилдис: «Вун че батальондисра джалла военнослужащибурис дад суман э. Чугъсагъул хьурай вас вун аркьая кумакис дагъусттандин хIатти суманра инсанди суманра. Мишттин майил фай фи кар аркьайчинра баладава», — пуне Табир Маликова.
Алексей Гасанова хIа кьимат йине «Каспий» батальондисра мебурин командирарисра.
«Чун аркьая дуздин курарира, аттивая маслихIетарира арайил акьуне кIилди чвал алийиная вазифабур», — пуне ме.
Алексей Гасанова баркалагь пуне региондин хIаттисра, дагъусттанагьлибурис мебури аркьая майилдис: «Читин усариъ ачархьу вахттуни, ппара нуш ве акьу кумак, ме Iари Iелеттар, аликIаттар, руб-дарманар дава, ме чIалунра йиркIуранра кумак хъара хIайи э».
Хаб гъургъуне руководитель филиала Государственного фонда поддержки участников СВО «Защитники Отечества», участник СВО, кавалер ордена Мужества Идрис Курбанов: «ДегIвиъ хье эскерари зурбадалди гъа чаб, мебурин хиял авейдава багу кIиларихъас, фас пучин мебурис ягIа герек иде майил, кумак багунттарис аяф. Чиппин разивел фай вере эскерарис кканде ачархьас батальон «Каспий».
Миштти идегуна хьес аргва джаллабурис фидегьен Iайи ме батальондихъ хъугъайчин инсанар». Ми учин багухъас вередегьен кумак акьасе пуне военослужащибурис.
«Че фондуниъ гьер са эскерихъди хъитIуна социальный координатар ая, мебурин хизанарихъдира. Чин ягъди чве багулив фая. Зас ягIа гъалибвел хьеф э», — пуне Курбанова.
Луиза Гусукаева
