Хьин дагълу инсанар э. Авала, Советарин хIуькумат хьастти, инсанарин дуламиш хIуппарикесна маларикес и. Гьертти учифас фи акьас аттрукьайчин, фиттилди дуламиш акьас вейчин, гьете кардихъ ахъихьайи. Малар ухIасттала, хIуппар ухIас са чIукь ичира рехIет и. Малар Iурдана хъитIанас алчархьа, гебурис IуькIер, нехъвар, ярма ахъийина кканве. Миштти идегуна, малар ухIас деветтар — сара хIурариъ кар адай, дуламишвар акьас, хIуппар ухIайи; учинттар хъудайчин, сасрабуринттарихъ вей кIил ухIайи. Миштти гьемишан: Iурданара, гIуланара гебурихъ вес хIав ккей кканде. Мирзабурин тухумдин илар четинвеларигьас гучIаттар дава: Мирзабрин МехIемадна, СалихIраIудар чуппар, гьегишттинттарикес и. Гебирин валадарна, хуттулара гьегиштти зурбабур э. Гьелебелеттарифас аттрукьа кар дава хIуьппехъенвел акьуб. Амма алчархьегуна акьуна кканде. Мирзабирин Мирза 1933-пе иса хуна aяфе, гебурин багунттарин чIаларилди, 2 ис хъучихьуна ликIина аяф э хе вахтт. Дегвин вахттуни, е баб, е дад хъундавай, сифтта хIабаба, хабди-бабан ФатIима агъа ччиччи ухIуттар э Мирзана мин чияр: Гюльперина, ХIуьрипери. Учин бицIи Iуьммур хIахьасттегьен, фера даркьай эркьвафттавуйи Мирза. Са бицIи кегъархьегъилди, учин бабан чу Духарин Ибригьимахъай сифтта хIуппар узагуна тебур ахъикас (ахъикубан са литIри цIурт ицIанхIела -гашин вахттар идегуна), хуппай ккеларихъ, хабди Iатте-бурIэттарихъ, ппай учин адад СалихIехъай, Милах -Рамазанахъай калхузин хIуппарихъ ушуф э ме. Гюльпери муядпе класс ккиркIугуна хурас Дербенттин педучилищайиди ушуни. Амма Iудпе курсуниъ хураягуна димари, абаб иттархьуна, гихъ ахъаджахIас хаб хIуриди адес алчархьуне мис. Абабра кIина, чиппи чиппин кIил ухIуттар э Мирзабурин МехIемаданра Байранкьизан шиникквар. (Учин ччуччун шиниккварис СалихIена, гин хьир Байранкьизара чиппифас вере иджвелар аркьай, гъил гьучихьайи). Мебур дуьхьуьна, хизанар акьуна арайил акьас кумак акьуне. Хабди мебур, чаб зурба хьуна(ятумарикес битумар хьуна), чиппин шиникквара арайил акьуне. Мирзайи къутт алдава хуйил учис хулара алгъадивуне, 4 кIиркIна са рушра хIа акьуна, дуьхьуьне. МекIилди ая, кучи aя дагъай, чулариъна сувaрил хIуппарихъ вей. Мин загьматар гIачушундава: джалла шиникквар зурбадалди лиханди, чиппин хизанар хъай ая. 65 истти хIуппарихъ хьуне Мирза, ягIа учин ке бицIи кIиркIахъайна гин сусахъай яшамиш вея. «Вас фи ккандe, че дад, чин фи аркьа»,- агъай, дадагьна бабагь гьуруцай ая. Мирзайихъай яшамиш вея Займура, дада суман хIуьппехъенвел аркьая: учин хIуппар ухIай,гьетебурикес кеттархьу хайирдилди чиппин дуламиш аркьая. Мис кумак аркьай, хъаттдархьай,учин кIиркI МехIемадра ая. Мебурис, хIуппар малар ухIаттарис, гьал хIукуматди кумакра акьасе пуна ая, авалан вахттарилас хIурариъ яшамиш веяттарис мункинвеларна, рехIетара ппара хьуна ая. Мирзабурин МехIемадан несилари (поколение) суман, СалихIен нeсиларира чиппин дадархIадарин пеша фадихьай адава. Сайи сасрайис гъил гьучихьай, арайиъ нуьхIубат ай Салихна Мурадра ая.(Мирзайин чибхар Кьулбанан шиникквар). Гемиштти, кьатI даркьай, кегъархьая несиларира хIуппaр-малар ухIай, дадар-бабарис кканеф аркьай, алавея хе хIурарин дагълу агьулар. Мирзайин 80 ис хьуная. Хъара джандин сагъвелна йиркIвуран сакинвел кам дахьурай учинра, тихъай хьера. Дунья сакин хьурай. Бабардадарин йиркIвар дугурай.
Тамам Рамзанова
