27 майди Iу хIуькуматин хIаттари Владмир Путинара Шавкат Мирзиева кIили файшуне Совет регионарин мегIрака. Дагъусттандин багухъас мегIракайл иштарак акьуне Правительствойин Председатель Абдулмуслим Абдулмуслимова. Российин багухъас мегIракайиди адина уй 20 губернаторар, хъара 250 гьер усарин хIаттар, журналистар, ариш-варишчибур. МегIракайин кьастI и Iу хIуькуматин арайиъ ая маслихIетар хъара ппара акьуб, цIуппе акьуб. Узбекистандин Президенти Шавкат Мирзиева ахъакьуне, ресбубликайиъ арайил аркьая курарихъас ариш-варишчибурин арайиъ ая товарооборотарихъас. «ЯгIайин ягъас ме регионариъ арайил аркьая 200 вартт хъай аркьа проектар якьу миллиард доллордин кьиматинф. Мебур кедавай, регионари хIезур акьуная хъара са гIуьфу миллард пулун маслихIетар. Зас пас кканде хъара ме аркьая са-Iу курарихъас. Садпеф, гьалдин хабра арайиъ ая ариш-варишвелар хъара ппара акьуб. Ахиран ери иса Узбекистандинра Российн арайиъ ая товарооборот 2,5 вартт хьуная. Ке лазимф, ме шейэр тич-мич файшубан кьайдабур иджвелин багухъди духIуба хьуная. Вере вазари че йиркIураъ ая Российъ дахъас Узбекистандин багухъас ариш-варишарин представительство мишттин проектарис майил акьас», — пуне Узбекистандин Президенти. Российн Президенти Владимир Путина учин багухъас пуне, ме регионарив фидегьен хIа мукь фай ичин Российнра Узбекистандин арайиъ дусттвелдин алакъабур цIуппи аркьай. «Ташкентиъ хье Советиъ завал хьуна уй хье регионарин вакилар» 22 российский губернаторар, 14 узбекистандин хIекимар, министерствобурин хIаттар, ариш-варишчибур, хъара джуреттара. Мебур джаллабур аркьа кардин гъавурдиъ аяттар э, гьалдисра ме Iу хIуькуматин арайиъ нуьхIуьбатхIуьлмат ухIаттар. КIвал акьасе, кIилди хIисаб акьучин 89 региондикес 78 региондин узбекистандин облостярихъай арайил аркьая Iударис лазим иде аришваришарин курар. Мишттин алакъабурилас, регионаринра хIаттаринра загьматилас асуллу э Российнра Узбекистандин арайиъ ая нуьхIуьбат хIуьлмат. Ягъди ме Iу хIуькуматин арайиъ ая маслихIетар вартт вея. МихIелдис арайил дакьуная маслихIетар ая хъара ппара. Ме Советил хIезур акьуная 20 маслихIетра комерческий контрактар, Iудара хIуькуматарин арайиъ ариш-варишар арайил акьас», — пуне Российин Президенти. Ме Iу хIуькуматин арайиъ аркьая маслихIетар арайил акьас фатуная 500 миллион долларов. «Россияйи учин багухъас йина ккане кьайда пул йис хIезурди ая, че пай 400 миллион долларов э. Ме пул фатуна хIезур акьуная. Агьал амеф бицIи-цIуре курар э. Мебура вере вахттари дуз акьуна арайил акьасе . Ме пулар фатасе экономикайин гьер багварихъди», — пуне Владимир Путина. Российинра Узбекистандин регонарин Советин мегIракайил гъургъуне Московский областин губернатор Андрей Воробьев, Астраханский областин губернатор Игорь Бабушкин, Ивановский областин губернатор Станислав Воскресенский, Ташкентский областин хIеким Зойир Мирзаев, Ферганский областин хIеким Хайрулло Бозаров, Андижанский областин хIеким Шухратбек Абдурахманов, хъара джуре хIекимара. КIвал акьасе, Дагъусттандин Правительствойин Председатель Абдулмуслим Абдулмуслимова Узбекистандин премьер-министр Абдулла Арипова гьучархьу арайи гъургъуне Iудара хIуькуматарин арайъ аркьая идарайихъас ООО «ASADBEK GLASS FIBER». Кар акьасе ми Узбекистандиъ Дагъусттандин предприяти ООО «Каспийский завод стекловолокна» хъай. Абдулмуслим Абдулмуслимован чIаларилди ме идара аркьаяф Iудара хIуькуматарин арайиъ ариш-варишар арайил акьас.
Луиза Гусукаева
