Сергей Меликова кIили файшуне дагъусттанагьлибурин Iекварин четинвеларин суалар хIел акьубан кардихъас мегIрака. Мисал гъургъуне энергетикарин гьунарарихъас, «Дагэнерго», «эффективность» агъа телеграм-каналарихъас, электромонтажный курарихъас.
ЦУРди агвар акьу кьайдабурилди аме исарин Iурдин вегIдабурихъ хъуттурфуна ме иса республикайиъ инсанарин гIерзабур чIукь хьуная Iеквар хъаттархьубан курарихъас, хъара аварийный курар дуз акьубас фарта вахттра лап чIукьхьуная.
Мишттин хатIа зад хьугъилди пешакурари тегIде — хIелди батIар акьуна гьадихьас алучIа. Хьес джаллабурис агуне ттиан исан Iурдра фидегьен цIуппеф, микIилф хьунчин.
Ахирангелайра тIабиIетин гьавабурин четинвеларихъ хъуттудурфуна алучIуна батIар акьуне ерхьи сеIетин арайиъ. Ме кар акьас аттрукьуб асуллу э электросетевой комплексдин программайилди Iекварин синарин кьадмивел алтухъ акьубалас. Ме программайилди курар акьу мукьариъ е кьацIра вейдава аварибур, ера хатIа зад хьучира хIеракат акьуна гьадихьас верегъилди аве ме хатIа. Са чIалалди сеIети дуз аркьа энергоснабжение. Ке ппара фикир республикайин хIатти ирцIанде суварин районарин энергетикарин курарис.
«Мебур лап кикин загьматин гьунарар э. ХIа гаф дакьуна пас хьасе: мишттин цIуппе Iурдин шартIар ахирангелай хьуни хьес Iу агъзурна цIаIудпе иса. Температура — къа градусдилас ахтт хьуна кулакра бицIиди вартт хьугъилди пешакурари джалла сад хьуна аварибур гьадихьуне суварин районариъ», — пуне Сергей Меликова.
Мебурихъай гьучикIугуна элхъенахъучика, Дагъусттандин хIаттин фикирдилди, сур телеграмм-каналари, чаб оборудование батIар акьас гIерзабур кьабул аркьа операторар э агъай гIаруцаттари. «Ахттармиш акьуне са хьимуд гьемишттин гIерзабур. Хъуттурфангунас мебурин хIа пай хьуне чиппи чаб агвар акьас аркьаяттар. Сасра источникариъ ая читинвелара, гебурин хIел акьубра хъедикIина ихьа чиппин каналариъ, хабди агвар аркьа мебур чиппин гьунарар суман, чиппи хIел акьуттар суманра. Фиштти чиппин хайирдихъди ишламиш акьас ве ватанагьлибурин читинвелар?!
Эгена чиппифас гидегьен батIарди джемеIетис хайри гъас вейчин, белики мебурис унахъасе хьин кар акьас «Дагэнергойиди»?
Мебурилди деликара йирай кардин, аварибур гьадихьагъилди.
Магьа гьеме кар хьасе кикиндира кумакинф!
Гьемегуна джемеIетира лап йиркIурастти чугъсагъул пасе». Идже кьимат йине Сергей Меликова «Россети Северный Кавказ» — «Дагэнерго» агъа филиалдин цIае хIаф иде Арсен Гаджиева аркьая кардис. Республикайин хIаттин фикирдилди ме инсанди са исан арайиъ агвар акьуне учин, джемеIетихъас йиркIв руцIуб, учин кар ламус кей акьуб. «Инсанди кар аркьай са ис дала давайчира ме уч лап хIа иджвелин багухъас агвар акьуне. ХIекьдандира ме джемеIетин иджвел ккане хIаф э. Ме хъучучIуне хьин лап дахи ахттилатарилди аркьая курар: пешакурар гIаттивубан реорганизация, идарабура мертт акьуне эхIттиб хъудава пешасузаригьас. ХъучучIуне «Энергия гор» агъа программара. Гьелбетта ме ппара читин кар э. КьацIра рехIет дава мидегьен ппара пешакурар гIаттивуна, мебурин ягIарвелар ахттармиш акьуна завал акьуб. Амма мебур хIезур э хурубарил алучIасра», — хъара хъучихьуне ме.
Региондин хIатти тапшурмиш акьуне правительствойис, ме проектис лазим иде кумак акьуна майил фачи пуна.
Гьемиштти хье Агъул райондин Iекварин курарихъра ахиран исари йиркIв фай хъучавея. ДухIуба аркьа трансформаторар, Iекварин синар. Гьеме кардилас асуллу ий магьа ттиан исан Iурдтти батIар напряженибур хьуне. Гьер са инсанди училас асуллу иде са бицIи кар хьучира йиркIв фай акьучин джемеIетин Iуьмура илгун хьасе.
Салихат Малагусейнова
