Ахиран вахттари хье хIуькуматиъ арайил акьуная ппара гьер джурейин программабур, проектар, ачмиш акьуная цIае идарабур. Мебур кIилди аркьаяф хье ватанагьлибурин Iуьмурдин шартIар алтухъ акьас, курар фадаваттарин сан чIукь акьас, инсанарис Iуьмур авадан хьас. Мишттин ачухъвелар исалас иса алтухъ аркьая хье хIуькуматин хIатти. Хьес джаллабурис ягIа, са вегIда хьуне хье хIуькуматиъ курарин кьитвел
ай, хурубар, пешабур кейчира амма алтухъ хIьукуматин кар адавуйи. Лиханас, къазамишвел акьас алчархьайи вес варха мукьарихъди. ЯгIайин ягъас инсанарис мункинвелар ппара ая кар акьас гIешкъ аяхаб авалдин вахттарихъ хъуттурфуна.
Кьанди хье хIуькуматиъ арайил акьуная «Земский учитель» агъафна «Земский доктор» агъа цIае программабурихъас хьес джаллабурис унихьуная. МегIелимдина духттурдин пеша мусхьучира ке лазим герек иде кьимат ая пешабур э. Агьал махьтабарин хурубар ккиркIва шиникквари алучIа хIапай гIаттивас цIае аттархьуная пешабурин хурубар (дизайнерар, программистар, маркетологар, интерфейсарин дизайнерар агъаттар, хъара сасра джурейин хурубар). Амма ме Iу пешайин кьимат мусхьучира вартт э. ЯгIайин ягъас джигьилар сайракди э мегIлимдинра духттурдин хурубар гIаттиваф. Миштти идегуна, хIапай кьитвел ая хье хIуькуматиъ духттураринра мегIелимарин. Ке ппара агьал четинди ая варха мукьариъ ая хIурариъ, районариъ. Гьеме кардихъас хье хIуькуматиъ гереквел ай арайил акьуне мегIелимаринра духттурарин программабур. Сифтта «Земский доктор» агъа программа арайил акьуне 2012-пе иса. Хабди, 2015-пе иса, хьуне региональный программа «Земский фельдшер» агъаф. Гьеме программа арайил акьугунахъасхаб ппара инсанарис мункинвел хьуне кар акьас хIурариъ.
Ме программайин ая учин шартIар. Кар акьас ахтигьар ая духттурвелдин хурубар кея шагьуриъ прописка аттарис. Кар аркьаттарис хIуькумати учин багухъасра пулун кумак аркьая. Са миллион манат ирцIанди ая духттурарис, гIуьфуверш агъзур ирцIанди ая фельдшерарис. Ме хIефттайи хьу прямой линиъ хье хIуькуматин хIатти Владимир Путина хаб гъадивуне ме программайин суал. Миллионикарис гъадивас кканди ая Iу миллиондихъди рукьуна. Ппара инсанарис, джигьил хизанарис мункинвел хьуная хье хIуькуматиъ суман цIае регионариъра. Ме программа арайил акьухаб, Агъул райондин ЦРБйиъра хубджи инсанарисра мункинвел
хьуная кар акьас ме больницайиъ.
Гьемиштти гьеме 2023-пе иса Агъул райондин ЦРБйи кьабул акьуная Iу инсан духттурвелдин пеша кеяттар. Сад мебурикес Мадина Азимовна э. Далгатова Мадина Азимовна э Северный Осетиас, Владикавказ агъа шагьурдиас. Ме хуне 1-пе майди 1991-пе иса. Хизан мебурин ппара хIаф дава. КIилди мебур ая гIуьфу инсан- дадна баб, хъара хьибуд чияр. Баб Мадинайин, Аминат, врач-рентгенолог э. Кар аркьая Владикавказдиъ, РКБйин МРТкабинетиъ. Дадас мин агъа Азим. Михъ хъая учин кондиционерарин фирма. Махьтабарин хурубар Мадинайи ккиркIуне Владикавказдиъ 2008 -пе иса. Хабди, махьтаб ккиркIуфна сад, учIуне хурас медицинский академиъ, СОГМА агъа мукьуйиъ. Ерхьи истти хуруне ме мукьуйиъ. 2014-пе иса ккиркIуне. Хабди ушуне ме хурас Ставропольский медицинский университтиъ интернатура.
Гьеме иса михъ хьуне учин хизан. ЯгIайин ягъас Мадинайихъ хъая хьибу шиниккв. Мадина кар акьас адиная Агъул райондин Типпигъарин хIурин ЦРБйиди духттурвелди, ЛОРдин пешавелди. Ме адиная гьеме Земский доктор агъа программайилди гIуьфу исан икьрар кьитIуна кар акьас.
Мадинайин чаларилди, ме пеша учин кьасттунилди гIаттивунаф э. Миштти ичира, гьелбетта, бабан пешайиласра ппара асуллу хьуне ме кар. Гьалдинхабра хIа агвалкьунара, сабура хьурай михъ халкь бадалди кар
акьас.
Наибет Гасукаева