Агьалдин заманайиъ ке хIа суал э джигьиларис гIилмин рехъ хуруна ккиркIучира кардин пеша найи мукьуйиъ гIаттивагьан агъай фикирдинф. Джаллабурис алчархьайдава кар аркьа мукьар кея хурубарилди. Iуьмурдин пеша гIаттивуб гьер инсандин ке хIа кьадам э. Мисала ая кар гIаттиваф келлайилди дава йиркIуралди э пуна. ЙиркIурас нуш вере карди инсан сархуш аркьа. Ачухъвел сархушвел хъай кар аркьа инсанди ухшар аркьа джемеIетин арайиъ ая маджилисар мегIракабура. Зас ягIа ахъакьас кканди ая учин гIуьмурдин пешайис йиркIв йиная дишагьли Ибрагимова Айиша Юнусовнайихъас.
Айиша Ибрагимовна хуне ЯрIугIарин хIуриъ 1963-пе иса хIа хизанди. КIилди мебур ая гIуфу чуна Iу чи. Дад мебурин дахи кIине Айишайис исна сур хьугуна. Шиниккварикес ке бицIиф э Айиша. Хизандин джувабдарвел архьуне бабан гардандиъ. Фидегьен кканчира загьматар четинвелар алчархьучира, Айишайин баба ухIуна арайил акьуне учин ери шиниккв. Джаллабурис йине гIилмин хурубара.
Махьтабарин хурубар Айишайи якьу класс ккиркIуне ЯрIугIарин хIуриъ. Хабди гIуфудпе классилас муядпе класс ккиркIвастегьен ушуне Дулдугъарин махьтабиди. Аме Iу класс 9- пефна 10- пеф хуруне Типпигъарин хIуриъ. Айиша Юсуфовнайи махьтабариъ амий ишттарак аркьай уй райондин, хIурин джалла мегIракабуригI. Миштти идегуна учин Iуьмурдин пеша гIаттивуне махьтабариъ амий. Махьтабарин хурубар ккиркIуфна сад !980-пе иса Айиша учин кьастт фай учIуне хурас МахIачкъала шагьурдиъ Культпросвет училищейин Хоровой отделениъ очно. Гьемисаъ Айиша Юсуфовнайи хуруне 4 истти. Хурубар ккиркIуфна сад хьуне ме кардик ЯрIугIарин клубиъ.Са иса кар акьуна хабди Айиша ушуне шувас Курагъди арайил акьуне чиппин хизан. Хизандин арайиъ хьуне якьуд шиникквар. Валадар ухIуна арайил акьуна мебурис гIилми йине, амма учин кар фадихьундава. Давам акьуне учин кар Курагъарин хIурин клубин идараиъ. ЧIал ухIубан рекъуьас са Iу суалар алихьуне зун Айиша Юсуфовнайис
— Ассалам Алейкум чвас Айиша Юсуфовна! Фишти аргва чвас гьер миллати учин чIал афухIубан кар?
— Зун э кIилин Iуьмур зе бицIи Агъул райондин гьава сувариъ дадан чIал гъургъай яшямиш хьу дишагьли. Миштти идегуна зун ппара шад э ме ахттилатарил.
— Чун кар аркьая Курагъарин хIурин клубин идарайиъ. Ахъакь зас фи кар чун аркьайчин хье Агъул чIал бадалди?
— Гьелбета чин хьудегьен алучIа мегIракабур хье чIалалди гъас. МисагI ме мегIракабуригI хIурин бицIиттар хIаттар джалла гIачихьас, фас пучин фидегьен мишттин мегIракабуригI ишттарак акьуна гъургъучин, гьегидегьен ппара гагьдисттегьен хье чIалра амилгванасе арайиъ. Авала инсанарин арайиъ алчушуб алттушуб, нуьхIуьбат — хIулмат ппара ай уй. Хизандин арайиъра ишламиш аркьаф Iари ху чIал ий. Агьалдин заманайи шиниккварис чIал ягIар дахьубан багьана э дадар — бабар.
«Инсандихъ хъай кканде е бехIc, е Iешкъ. Ме Iу карди гIуьмурдин рекъ ачухъ акьасе. Миштти идегуна гьер са инсан фикир фай тIушуна, хье гIедатар хье чIал афухIуна, кегъархьая несиларилди рукьас акьуна кканде», — пуне Айиша Юсуфовнайи.
Наиба Гасукаева
