Яраб фидегьен батIар мукьар аягьан пуна фикир ве, кьацIра инсандин лек дирхIу усар. Джуре мукьарихъас кьацIра гъургъас фикир адава, хье ватандин ухьттан мукьар ами. Амма агвас йиркIурас кканчира, мункинвелра вейдава, фас пучин, хьилаба вес варха э, машин фай вес рекъ адава. Миштти пучира, ме иса ме кардис мункинвел джикIине хье райондиъ джигьилари. Са фулан кьайда джигьил шиникквари, джаллабури чIал сад акьуттари суман, гъушуне илгун джурейин матацикар, найич кканчира дагьар-дабур дагъай агъавереттар. Ме шиниккварин чIаларилди, матацикар гъушуна аяфра чиппин элар ккетас, иджи алархьуна гьикас дагIаттари, гьикасра ягIар акьас, хъара хулас гереквелдис ишламиш акьасра хьасе пуна э.
«Зун ппара вахтт и ме джурейин матацик гъушуна гьикас ягIар акьас кканди. ГIешкъ ами дахьухаб йиркIурас ккане кар арайил акьас, фиркьа гебурикес. Са-са вахтт аве инсандин фичира джаллайихъ хъудава суман шейъ ккане ара. Гьегиштти хьуне засра. Кьиматихъас гъургъучин, гъушанас давередегьен кьимат агъа задра дава. Гьалдис ме матацикар хъаттар 20 дегьен хьуная», — ахъакьуне ме матацик хъае МехIемад агъа шиникквди. Райондиъ хье хIурин шиниккварихъ хъаяф кидавай, сасра хIурарин шиниккварихъра хъая мишттин матацикар. Найчира вес кканхьугуна, сад сайис хабар акьуна, завал хьуна ве мебур чиппис дагу мукьарихъ, гьава суварихъ, хIурарихъ хъуттурфанас. «Садпегелай матацикар фай чин ушуне ЧIаарин хIуриас агъушуна Курахский райондиди, тидас ададине КьасумхIуриди, гидас адине хаб хIуриди. Iудпегелай чин ушуне Iемухъди, тидас ГIенкIлугъди, хабди Дахадаевский райондиди. Гидас аларуцуна агъадине чин Iемухъди, мидас адайшуне Цирхьеди, мисаъ экьуна самуз шалвавелра ккетуна, хаб рекъуьъ учIуна ададине Кьушан-дерейиас Дулдугъди, гидас хуппай хаб адине хулади. Ме нубати хъай адаркай чин уйи 7 инсан. Ушудегьен мукьарикес ке Iайи зе йиркIурак киме чин алгъушу ус хье райондин ке гьава Джуфудагъ агъа дагьар. Ме дагьарин гьававел э 3015 митlри. Ме дагьар ая Табасарандин, Хеварин, Агъуларинра хъара Къайтагъарин дазуйил. Мисалас джалла багвар аргва, Каспий хIуьлра кехIей. Йиркlв ачукъве самуз гьавабурил аларцугуна, тамашибура ппара ве, элара ккеттве», — пуне МехIемада. Хъара, тич-мич адаркубарихъас гъургуна, МехIемада йиркlурал акьуне чиппил алчархьу читинвелара. Агъаф суман рехIетти вей хьуна адава мебурин рекьра, гагь матицикар чlирвей, гагь алгъадаркай. Иттар акьубара кам вей хьуна адава. lуьшан рекъериъ архьуна, сайи сад хъучlирхIай гъаре вахттара хьуне мебурин. Хьес гебур матацикара фай адаркагуна, фикир ве, фидегьен иджи э мебурис найч кканчира весра вей пуна, амма гебури гьика матацикара рукьакес акьу задар э, чlирхьас са багьана э кканеф. Фидегьен читинвелар алчархьучира, гьегидегьен тамашибура вей хьуне мебурис, джалла читинвелар йиркlуралас хум верегъилди. «Завас захъай уйи дусттарин фикирдихъас пас хьасттава, амма зе фикирдиъ ппара иджи илгуне чин аруцу, ушудегьен мукьар. Са ягъара пушмалра хьуфдава зун, фиттис гъушуф эгьан зун гьеме матацик пуна. Зе матацик дахьухаб, зас гьемидегьен дуньяйин ухьтан мукьара агвасттавуйи.. Дуньяйин батIар мукьар агуб бадала, пара хьа кьимат ая матацикарис. Фас пичин найч кканчира, кьацра рекъ кидава усариасра кехIей гьикас вя. Джигьил шиниккварис, матацик хъудаваттарис, зун насихlет аркьа гъушан пуна», — пуне МехIемада. Са чIалалди гьер инсандин гlешкь ай кканде, фитин хьичира гъавурдира ай иджи э, гьер са шейуьникес муфиlетра кеттивайс ягIайра кканде.
Батитай Габибулаева
