Зас ягIайдава джаллабирис ягIай уйчин, 1951-пе иса И. В. Сталина буюрмиш акьуна уйи: гьер са кардил хуру, пеша кея инсанар гъурзар акье пуна. Гинра, Коммунистический парттин лозунг и: «Кадры решают всё» агъаф.
ДехIела мегIелимар гьудуркIа мукьариди хуравус ккиркIу джигьил мегIелимар гьикайи. Гьете, 1951-пе иса, хье райондидира аттархьуне джигьил мегIелимар. Сад мебурикес Нина Федоровна Шамсудинова(Шпинькова) э.
Нина Фёдоровна Шамсудинова(Шпинькова) 1929-пе иса, 11-пе майди Пензенский облсттин, Тамалинский раондин Варварино агъа хуриъхефе. Махьтаб ккиркугъилди, ме ушуне Саратовский областтин Энгельс агъа шагьурдиди педучилищайиъ учIас. 1951-пе иса, мевус ккиркIуна, сара хурас вес ккандахьуна, кар акьас весе пуна ая ( ми Iайи иджи хурай уйихIела, мин мегIелимарис хъара хурас ушуна ккади уйи агъа ме).
Хуруб ккиркIуттар, хIуькуматти Iу исанди джалла лазим иде мукьариди гьикайи. Нина Фёдоровна хубджи сасра мегIелимарихъай Дагъусттандиди аттархьуне. МахIачкьалайиъ мебур гьикагъилди хьуне гьер районариди, тегуна мегIелимар савусаъра гьуркIай адавуйи. Мифас хабар гъушуная: «Вас нае райондиди вес кканде»,- пуна. Са районра дагIай, ми пуная на «на А, пусть будет Агульский район»,- пуная ми.
Мич, хье райондиди Iуьрусаттиъас адемегIелимар гъас адина ахьуная джигьил IЭмухъарин мегIелим Шамсудинов Фейзуллагь Османовичра.Хъай Нина Фёдоровнара(сара фуш хъай уйичин ягIайдава зас) адиная мебур. Хеваъас вартт (авал машинар вей давуйи) мебур IэрабайигI гIучIуна адиня. Рекъди верегуна, Iэшай хьуная ме: «Фишттин мукьариди э зун аттархьуна аяф»,- агъай.
Гьемиштти аттархьуне Нина Фёдоровна Iэмухъарин махьтабиди мегIелимвелди. Дарсар киланфра учдегьен шиберис и агъа ми. Тебирис хурасна ликIенас ягIар аркьай Iу иса мисаъ хьуне ме. Мисаъ ушуне Фейзулла Османовичас шувасра ушуне ме. Хабди,шуй найч ушучин, гьетихъай мера гьер мукьариди вейи. Найч адичин, гьетисаъ махьтабариъ бицIиттарин мегIелимвел аркьайи Нина Фёдоровнайи. Фи кардис хьичира мис шува гъил гьучихьайи, ми шувасра: сад сайис даягъ и мебур.
Iу исалас Фейзуллагь Османович гьикуне Дербентский райондиди. Мисаъ Новопосёлок агъавусаъ амилгуне мебур кар аркьай Iу иса, хаб Агъул райондиъ, 1956-пе исалас 1962-пе исасттегьен Типпигъарин махьтабиъ кар акьуне.
1962-пе иса Шамсудинов Ф.О. гьикуне МахIачкъалайиди. Хаб Iу исалас Агъул райондиди (1964-пе иса) адине . 1964-п исалас 1973-пе исасттегьен Нина Фёдоровна Типпигърин махьтабиъ кар аркьй хьуне. Шиниккварис ппара кканвейи чиппин мегIелим. Мисаъ мис «Заслуженный учитель ДАССР» агъа ттур йине. Ппара идже дишагьли и Нина Фёдоровна.
1973-пе исалас Нина Фёдоровна МахIачкъалайин 17-пе махьтабиъ кар акьуне уч пенсиди весттегьен. Ме ягIадегьенттари «идже инсан э» агъа михъас. Нина Фёдоровнайи дарсар кийи инсанарира, гихъай кар акьуттарира, гьакIанди гьчурхьуна ягIаттарин йирквуралас весттава ме. 2017-пе исан 10-пе февральди кIина, МахIачкъалайиъ икIyне Нина Фёдоровна. Иджевусаъ мукь хьурай учин.
Тамам Рамазанова
