Музеяр — вахтт гъурзар акьуна ухIа суман мукьар э. Мебури тарих афухIаф суман, микес инсанарихъай гъургъуна уч ягIар аркьа ахттилатчира аркьа. Академик Дмитрий Лихачеван чIалар цитироват акьуне Дагъусттандин премьер-министрди.
Миллатарин музейдин пешакурарихъай гьучархьубан рамкабуриъ ай аркьая ахттилатаригI Абдулмуслим Абдулмуслимова кIвал акьуне, алттушу верш исан арайиъ Дагъусттандин музейдикес мугI хьунаф несиларин алакъайин.
«Ме иса хьин кикиндира къаршиламиш аркьаяф тарихдин лап хIа вакъиа э. Вакъиа джалла миллатарин гIая культурайин хIавеларинф — республикайин культурана ирс ухIа ке хIа хазин хулан верш ис хьубанф. Алттушу асирдин арайиъ хье музейдикес несиларин арайиъ мугI хьуне. Гьер са выставка, гьер са экспонат заманабурихъай ахттилат, гьалдин инсанарис камаллувелдин дарс э. Чве выставкабурилди, гъаре ягIарвелдин дарсарилди культурайин инициативабурилди чун юз аркьа, музей — ме гьакIанди артефактар ухIа мукь дава, ме хурас, фикир акьас, цIаегъилди яратмишарин агалкьунар алтухъ акьас вере мукьра э», — пуне Абдулмуслимова.
Тахо-Годин ттуранихъ хъая музейдин китабиъ Абдулмуслим Абдулмуслимова учин насихIетара атуне.
Ватандин ХIа дегIвин 80-цIур ис верегуна акьу экспозицин усттулихъ хъая вегIдайира Дагъусттандин премьер-министр Абдулмуслим Абдулмуслимова ликIина уйи учин насихIет. Микес ке лазин страницабурикес сад хьуни ме китабин.
Лап хIа чугъсагъул хьурай РД-йин культурайин Министерствойис, музейдин пешакурарис мебурин йиркIвна фикир фай хье ху джилихъас, Ватандихъас лихубан. Хье гIедатар ухIуна хьехъди рукьас акьу зурба несилар йиркаIвариъ ухIубан…., — ликIине Абдулмуслим Абдулмуслимова ме китабик.
Гьеме музейдиъ ая Кавказдин дегIвин экспозицибур, хъара имам Шамилан шейэра.
Ме хье зурба гьужумчи, полководец, игит, имам Шамилан шейэрин надир экспонатарихъ миллатарин музейдиъ хъуттурфуне Дагъусттандин премьер-министрди Абдулмуслим Абдулмуслимова.
Музей ухIая Заира Кильдеевайи йиркIв фай таниш акьуне гIулар сайрак, кьит иде экспонатарихъай документарин кIеджарихъай, хъара экскурсионный залариъ ая надир ишкиларихъай.
Ке ппара ул ачартаф гIулари имам Шамила ишламиш акьу шейэриъ ий, ке Iайи ме Iуьрусаттин есирдиъ Калуга агъа шагьурдиъ аягунанттар.
«Мебур XIX-пе асирдин кIеджар, лиркIен усттул, хъуьсубур Iуьрччан набор, хIейвандин пурар, узенг, хъара ая Шамилан, мин хизанарин ишкилар. Фикир фачарта хъара, имам Шамила учи ликIи кIеджариъ, императординра дегIвин министерствойин адресдиди гIераб чIалалди», — ахъакьуне музей ухIатти.
Премьер-министрди баркаллагь пуне Заира Кильдеевайис ме файшу экскурсихъас, йине мис батIар тукарин кIунчIра.
Салихат Малагусейнова
