ЯгIайин ягъас инсанарин арайиъ ке ппара ая суал э «Вун вакцина акьунев?». Ппараттарис гъам кея, фиштти хьасегьан пуна руб йирхIухаб джандин гьава, са ппараттарис дуьйин хабарар унихьай гучI гьархьуная. Ая кьацIра балагIадавай ме кардихъди тIуршаттара.

Сад гьемиштти вакцина акьас рази хьеф Курбанова Майрам э. «Зун инсанригI кар аркьа вахттуни, ягIди ая мункинвел иттархьас. Агьал хьес аргвая фидегьен иттаттар айчин. Зе багу – кIиларисра киркьуне коронавирус. Iайи иттархьеттара хьуне, алтухъ читинвел дахьуна алттушуттара хьуне. 

Зе баб лап Iайи хьуна больницайиъ архьуне. Ме ахъихьуне ИВЛдихъ. ЯгIа больницайиас хъатуна хулаъ ая баб. Амма джандин гьава иджи арайил хьуна адава гьалра. 

Мебур аргвай, зун зас аттивуне маслихIет прививка акьас. Зун иттархьуна ахуниъ архьичин, ке удигьай читин хьасе зе шиниккварис, хизанарис. ДехIела, кьацIра са чIире фикира адавай зун ушуна йирхIуне вакцина. 

Рубу зас алтухъ хабар йиндава. Е бушвелар, е Iуьрар, е температурабур зе хьундава. Ке удигьай зун ме руб йирхIуф зе джандин сагъвелдихъас э, хабди аметтарихъасра фикир акьуна. 

Луиза Гусукаева