Гьеме ягъари Народный Собранин Председатель Заур Аскендерова иштарак акьуне Российин Игит Магомед Нурбагандовас памятник дахъубан мегIракайил Махачкала шагьурдиъ. Хъара ме мегIракайил иштарак акьуне Дагъусттандин хIатти, генерал — полковник Сергей Меликовара. Игитин фикирдин хIуьлмат бадалди мисаъ завал хьуне мин дад, РФдин Госдумайин депутат Нурбаганд Нурбагандов, РФдин Госдумайин депутат Бийсултан Хамзаев, Рдйин Росгвардин Управленин вакилар, РДйин МВДйин пешакурар, джемеIетин идарабурин пешакурар, хъара джуре инсанара. Сергей Меликова учин гъургъубагI ахъакьуне ме памятник дахъуб Российин Игит, офицер Магомед Нурбагандован гьунарлувелдисна зурбавелдис хIуьлмат агвар акьуб э пуна. Дагъусттандин хIатти кIвал акьуне Iу агъзурна цIеерхьидпе исан июльдин ваз. Гьеме пушмал кардихъас э пуне ме ваз хьес ягIайин ягъас игитвелдин чишна хьуф. Хабди РФдин Игит Магомед Нурбагандованра, ватандин удигь чиппин бурдж ирцIан рекъуьъ кIи джалла аскерарин фикир бадалди са дакьикьайи джаллабур буIуне. Учин ахттилат хъучучIу вегIдайи Игитин дад Нурбаганд Нурбагандова хIа чугъсагъул пуне памятник акьубан рекъуьъ иштарак акьудегьен инсанарис, учин кIиркI кIвал акьас ме мегIракайилди адидегьен инсанарис.
«Ери исан удигьди че хулал хIа хъахъ алийине. Те ягъахъас мич чун ппара майил йина, йиркIв гъушуне че хизандин. Гьалра иджвелин чIалар вей аме че хизандис. Чвас чугъсагъул ме кардихъас», — пуне Нурбаганд Нурбагандова. Гьемиштти ибгIа чIалар Магомед Нурбагандовахъас пуне мегIракайил гъургъу сасра инса нарира, генерал — лейтенант Василий Стойкойи, СВОйин иштаракчи майор Гаджирамазан Шахмарданова. Хабди кIилдибури Магомед Нурбагандован памятникдил тукар алийине. ДжемеIетин Собранин депутат Заур Аскендерова мегIракайихъас гъургъугуна, памятник дахъуб — ме Российин Игит Магомед Нурбагандован гьунарлувелдисна зурбавелдис хIуьлмат агвар акьуб э пуне.
«Хье ватанди лап хIа ахттигьар фай фурс аркьа мишттин игитарилди. Чиппин ватан кканхьубан чишнабур э мебурин гьунарар. Магомед Нурбагандова, учин джандиъ нафас амедегьен гагьди, ватан, аскервелдин бурдж масса йиндава. Мин «Работайте, братья!» агъа чIалар кIилди дуньяйиди далгъуне. Мебур лап даринди учIуне гьер са аскерин йиркIураъ. Гьеме чIаларилди кар аркьай ая хье СВОйиъ ая аскерарира», — ахъакьуне парламентин хIатти.
Салихат Малагусейнова
