Русский драматический театрдиъ А.М.Горького ттур алеттиъ хьу маджлисиъ завал хьуна уйи багу кIилар, хъай кар акьуттар, гин акьу кар кьабул вереттар, хъара мастерар чеканной строки дагъарарин хIукуматин гIешукьан.
Адеттарис иджи гъузурив пуна Рамазан Абдулатипова пуне: хье Дагъустандин джил девлетлу э гIешукьарилди, дагъустаншувар инсанар гIешукьвел аяттаре кIилиъ, гебурин гIешукьвелара чиппин дуламишвелдихъди багу э.
Дагъустандин хIатти пуне хъара ттур ая гIешукь хьуна Юсуп Хаппалаев гьаттархьундава халкьдигьас, хъара багу хьуне учин мерIерихъди. КIилин учин Iуьмурдиас файшуне ги кканхьуб учин ватандихъди, ватандихъас мегIнибур ликIенди. Ватанди йине гис фитихъас ликIенчи, фиштин макьамар аркьайчи, агвар акьуне учин халкьдис ме инсандин учис ухшар ие гьва яхул джилин гIешукьвел, Хурукра хIурин гIешукьвел.
Хье главайин чIаларилди гIешукьвел ликIи хатIаригI аргвай ая Iуьммур, экьуб гъайшиб ягIархьубан уьркIевел, хабар ве хьес багу дагьарарин, уьркIе ачIарин рангар. «Юсуп Хаппалаеван гIешукьвелдигI ая зарафатар, хIекьдан гафарар, васибур учин Iуьммурдиъ агуна ая курарин. Дуздин фикирар, Iайи ликIина хатIар, ге вахттуни гIудул гьава ватандихъди аркьа гин кар учинф агъасуман, багуйи гьалдинттарис» — пуне Рамазан Абдулатипова. Ги кIвал акьуне, учин ирхе Iуьмурдиъ Юсуп Хаппалаева сагелайна Iугелай дава Дагъустандин культура агвар акьуф республикайин те багварихъ, мусс хьучира, нандиъ хьучира илгванди игит суман, хIекьдан дагъустандин шиниккв суман.
Учин ахттилат кIиркIвай Рамазан Абдулатипова зас ягIа пуне ме маджлис 100 ис хьуна пуна хье халкьдин гIешукIан, хьасе идже ишарат суман гIешукьвел кканеттарисра, ягIаттарисра.
Чиппин вахттуни гIалашувари гIешукьари, са чIалалас джуре чIала гъаурди ихьаттари хье хIукуматин гьер регионариас, Российин писателарин Союздин председательди Генадий Иванова, московский писательский организацин хIатти Иван Голубничайди хъара сасрабурира кIвал аркьай хьуне мет тур ая гIешукьахъас, гин гIешукьвелдин зурба багвар агвар акьуна.
Мисаъ хъара гъургъуне Дагъустандин писателарин Союздин председател Магомед Ахмедов. «ДагьараригI хуф Iари гIешукь дава, гин мегIнибура э. Ватандин читин хасият киркьуне мисра. Ми файдине Дагъустандин гIешукьарис джаллабурин давасуман рангар, саебур давасуман хье ватандиъ хьуна аяттар. Инсанвел, иджвел гин хатIарин кумак ве ацIун гIешукьарис агьалра» — пуне Магомед Ахмедова.
Ме маджлисиди адина хьуне РД Народный Собранин Председатель Хизри Шихсаидов, РД Правительствайин Первый вице — премьер Анатолий Карибов, РД Культурайин министр Зарема Бутаева, культурабригI, искусствойигI, гIилмуйигI гIаттар.
ГIешукьан шиникквди Сулейман Хаппалаева чугъсагъул пуне Дагъустандин хIаттис 100 ис хуна пуна Юсуп Хаппалаеван хIа ягъ акьас указ акьубан, хабар акьуне ацуна районариъ маджлисар акьуне пуна ме кардихъас. «ме хIа кар э че дадан загьматар гIачадавес акьуна аяф. Ги эвел акьуне чIера, джигьил литератораринра чиппин чIала ликIенттарин. Гис гъам вейи чиппин чIаларилди ликIен инсанар чIукь вей аяф».
КIикIубарихъди маджлис хуруне Юсуп Хаппалаеван ликIибар. Хъара хьуне яхул чIалан мегIнибур, макьамар Дагъустандин народный инструментарин Государственный оркестрди акьуна.
К. Мирзоев
