ЯгIайин ягъас кар акьас ккане инсанарис дуьйил ая ери джурайин пешабур. Гьер са пешайи ухшар аркьа инсан йиркIв фай кар аркьагуна. Сад ке лазим пешабурикес ягIа ямагар аркьаттар э. Ямагар аркьа инсан пегуна, са​ гьакIан чIал суман ве, е гьеге пеша суман вейра дава. Амма ме кар рехIетинф пас вереф дава.​ ХъучучIу кар вахттунис кIили рукьас акьуна кканди аве. Агьалдин вахттунис хъара лап зурба ттур ая пеша э ме.​

Хъара четин э ме кар акьас хIуькуматин идарабуриъ, джемеIет ачадина, Iеле усариъ. Миштти идегуна инсандис кьабул верегъилди, баркаллагь хъай Iелегъилди ямаг хIезур акьуб ппара хIа кар э. Гьер ягъа багами дахи гъайшина, вахттунис кардилди адина, батIар ширин ямаг хIезур акьуб шиниккварис хIа кар э. Гьер инсандивас кIили гъас​ хьасттава ме кар, хъара хIа сабур хъай кканде исарилди кар акьас.​

Сад гьемиштти ттур ая ямагар аркьа инсан Типпигъарин хIуриъ Амаева Магьият Абдуллаевна э. Типпигъарин мактабин столовыйдиъ ямагар аркьа кардил къа истти кар аркьаф.​ Джалла мактабиъ ая шиниккварис ме Магьиччай агъай ппара Iайи кканве. Гьемиштти шиниккварихъас ягIа хIаттарира-бицIиттарира Магьиччай агъа.

Магьият Абдуллаевна хеф Типпигъарин хIуриъ 1968 иса. Мактаб ккиркIу 1985 иса учIуне хурас Каспийскдин медучилищейиъ. 1989 иса хурубар ккиркIуфна сад хьуная ме хIуькуматин кардил МахIачкъалайин детский многопрофильный больницайиъ шиниккварин медсестравелди. Мисаъ кар акьуне Магьи Iу иса. Хабди адине кар акьас хIуриъ ая больницайиъди патронажный медсестравелди, мисаъ кар акьуне хьибу иса. Хабди ушуне ме кар акьас мактабиъди медсестравелди.​

— Магьият, вас мубарак хьурай хьеме адиная​ хIуьлматлу Рамазандин ваз.​ ​

— Чугъ сагъул, чвасра мубарак хьурай джаллабурис!

— Фиштти медсестрайин хурубар кей вун мактабин столовыйдиъ ямагар аркьа пешайил рази хьуф?​

— Сифтта кIилиас зун ушуф мактабиди медсестрайин кардилди и. Больницайиъ кар аркьа вахттари, хье мактабиъ​ уйи медсестрайин кардин мукь. Ппараттарис​ больницайиъ кар аркьаяттарис гьучихьуне ме мактабиъ медсестравел акьас, амма сайира кIил ккийиндава ме кардикк. Зун хьуне рази ме кардилди вес. Са вахттунилас бадил хьуне мактабиъ столовыйдин кар. Мичра кар кканде агъай ади инсанарис хIурин хIатти агвар аркьайи гьеме ус. Мичра кканхьундава инсанарис адес. Хаб зас гьучихьуне акье пуна ме кара. Зас медсестрайин кара акьуна столовыйдинфра акьас четин вейи. Сара хулаъ хизанарихъайра гъургъуна чин аттивуне са маслихIет. Сара айчIуна медсестрайин кардилас, зун башламиш акьуне повардин кар.

— Магьият, четин вас хьуф шиниккварихъай кар акьас эв, хъара вас кар ппара алчархьахIел эв?​

— Шиниккварихъай четин хьуф дава, зас мус хьучира шиникквар ппара кканверефе, кар ппара​ алчархьайи. Те вахттари мактабиъ​ гIуьфувершдегьен уйи шиникквара. Саттира ай са чIукь четин вейи тегуна. Четинвел фи э пичин? Сад ке хIа четинвел хьеттинф и. Iудпеф, ибгIавел адавуйи. Шиниккварис исттиканариъ чай агьатугуна, ругъувелдиас чурхъайи. Хьед гъаре мукь варха и. багамис файди хьеттар, битав хьуна, меркквура фацуна авей. Шиниккварис ме четинвеларихъас хабар дава, дехIела зе ке хIа вазифа и вахттуни мебурис ямаг, гуни хъучихьуб.​

— Те вахттарилас фи духIубабур хьуная ве кардил?

— Гьал зас хьуная ппара ачухъвелар. Авалдин четинвелар андава. Чин гуни хIезур аркьа ус, Iеле ус джурейи хьуне. Дивуная хьеттар, алийина хьед ибгIа аркьаттар. Хьуная ацIуна кумакар. Къабар Iуьрччанттар, джигагьар джикаттар, агьилан-гьаттиваттар. Шиниккварисра агьал ая баттар гьер джурайин ямагар акьас мункинвелар.​

КIилди гьеме иджвелар хьуф хIаттин кумакилди э, инсанарис курара хьуне, зас кумакра, шиниккварис батIар ибгIа ямагра.​

Наибет Гасукаева