АхIмад хIурилас ушуне,
Хьибу рекъуьн арайиъ хьуне,
Фикирдик ме кечашуне,
Акьу кардил пушмал хьуне.
Арайиъ ае майдан рекъди,
АхIмад учIуне сафардиъ,
Гъалайихъас фикир дакьай,
Рекъуьн яIунаъ гъадаркай.
Рекъди инсанар гIвая,
Мис ул ерхIафра адава,
Са дишегьли гъачагIвая,
Фацуна ме гъадивая.
Рекъуьл але булахихъди
АхIмад фацуна гьачагъая
Гъил на къуьсу ра Iуьччуна,
IуьтIафра ми мис ицIая.
Дишегьли ме хъай адине,
Халади хъай ачашуне.
Але дард дашегьлис агуна,
— Зас хъакь сара ве дард пуне.
Дишегьлин гудж ппара хьуна,
Але фикира кьекье хьуна,
АхIмад ра рази хьуна,
Але дард мис ахъакьуне.
Вун суманттар ппара хьуне,
Шиниккв ра хьирас хуруне,
Шиниккв дуйил хьуна,
Бав дуйилас ушуне.
Кьумши хьирас Iегвал хьуне,
Руш училди тин пуне.
Рушас Аминат пуна
АхIмада мис ттур йине.
Дара ае кIур суман
Аминатра хIа гIвая,
Гъера ае тук суман
Ягъалас ягъ батIар гIвая.
Аминат ахIа хьуне,
Мактабара ккиркIуне,
Амината дадас пуне,
— Вахъ фишра хъаду? — пуна.
— Хъая, захъ са бав хъая,
Бавра вархайиъ ая!
Амичин, андавайчин,
Зас агьалра ягIайдава.
— Эй, зе дад, вун засра уп
БицIифра зун ахIа хьуне,
Эй, зе дад, вун засра уп,
Ле вас бава фикьуне?
Идеф идехилди пуна,
Рушан йиркIв дард акьуна,
Дадас минатра акьуна,
ГIварехилди рази акьуна.
Рекьуьъ учIас хIезур хьуне,
Машиниъра худ ихьуне,
ХIурихъди ра багу хьуне,
АхIмад IемкIен ра хьуне.
Дуст ерхьуна кIи ус,
КIвал хьуне мис гьете ис,
Мин ширин джан буш хьуне,
Мис ругъу IемкI ичине.
Дадал руш алчухьуна:
— Фие вас агуф, — пуна.
— Зас фира агундава, —
Рушас АхIмада пуне.
Халахъди мевур рукьуне,
Хулал рукьар алди хьуне,
Кьумшин раккигь джигьил гьая,
Руша улар тис атая.
АхIмада мифас гьирхуне:
— Гьанан геда вун э, — пуна.
— Дад на бав зас агуфттава,
УхIуф зун кьумши хIабава,
ХIабава зас хъакьуфе
Учисра са геда хьуфе,
Гулуна тера ушуфе,
Гисра АхIмад агъафе.
АхIмадан йиркIв дард хьуне,
Дунья мис мучIе хьуне,
ЙиркIураъ Iешал архьуне,
ЧIалар дафчархьай хьуне.
Руш на геда муьхIтал хьуне,
Са сайис улар атай хьуне,
Фи эгьан дадас акьуф пуна,
Рушан йиркIураъ хиял хьуне.
Адине некьварилас ра,
Фай адине гелегвра,
Ачашуне халадира,
ЧIире хал суман хьуне.
Гедайин йиркIура руш дивуне,
Руш тин агъай, геда адине.
Дадас нуш ахттилат хьуне,
Акьая зун вас пешкеш, пуне.
Акьуне цIакIин,
Хьуне сакин.
Лейли на Меджнун суман
Сад сайил бахил хьуне.
Са кIаратI шиникквар хьуне,
АхIмад хуттулардал бахил хьуне.
Исаев Катиб Ашурбекович, село Мисси
