Гьер иса къана ерид пе сентябрьдиъ хье хIуькуматиъ аркьа воспитателярин хIаягъ. Ме ягъан сан аттивуная хье хIуькумати садпе садик башламиш акьу вахттунин ягъа. ХIисаб аркьа ме ягъ агъзурна муя вершна яржцIурна хьибуд пе исалас мич.

Iу агъзурна якьуд пе иса хъана ерид пе сентябрьдиъ, тастикь акьуне хье хукуматти ме хIаягъ суман. Воспитательдин кар рехIетин суман ве хьес джаллабурис. Амма ппара хIа кар кIилиъ гъадивуна кканди ая мебури. Ппара сабур хъай, учин йиркIв йина кканди ая воспитательди гьер шиникквдис.

Хьес ягIа шиниккварин хасият, тIул-тIабиIэт гьерттин сад суман вейдава, са хулаъ ая чуппар, чияр ичина гьерттин хасият джуре ве. Воспитатель хIисаб аркьа Iуд пе баб шиникквдис. Авала садикар адава вахттари девлетлу инсанари хулаъди гъай хьуная йина учин кьимат воспитатель. Гъай хьуная сасра хIуькуматариас, хIапай Франциас хъара Англиас. ГIаттивай хьуная ге кардис батIар агубар але, идже хасият хъая, хурубар кея джалла курарин гъавурди ая хумбар. Фас пучина шиниккв вардиш акьас, гъавурди ихьас.

Хабди хьуне садикар, продленкабур, яслибур, — мишттин мукьариъ кар аркьаттар э воспитателяр, хъара детдомариъ, интернатариъ. Хьес кьадри кьимат дагIайчира амма ппара джафайин кар э. Са гIелимди ликIиная миштти: «Чаркквар пеIеласра кканве агъа, амма гебур вардиш акьунара кканди ая».

Наибет Гасукаева