Дадна баб хьунае гюзел хIур
Фиштти кIвалас весегьан яраб.
ХIададариласра тич, хIададарин некьвар
ДугIа дакьуна фиштти хьасегьан яраб.
Я, гьава суван кIилил алди ая джейран,
Пашмалди хъуттурфандия вун ве ккеттархьунае хIурис.
Я, вархалас адиная хIададан хуттул,
Фиттин гIешкъуна хъуттурфанасе вун ве хIурис.
Зегьметилди акьунае дадарин хулар
ГIайшуна иланар чве руцая.
Азиятилди алчахъунае гIунарилди бабарин гъвадил ругар
Кулакарина угъаларифай чве гIавея.
Аллагьди йинае гюзел майданарин IуькIер-тукар
Алгъавей алахъая хи ле чве.
Гьер ккачаригIас алавее дарман кее хьеттар
Рукьай, цIурай ая хи, ле чве.
МехIсул уза хуппурилас
КIаратIилди чулле луфар гулуне.
Шушабур гIадавай тIагараригIас
Къваъ атай къерекъелар гьишине.
Ккане ватандиас вун авчIучира,
ХIурин ттур кIвалас гьамарта сара,
Iэгвале хулар фадихьуна вун ушучира
Ватандин ттур масса майицIа сара.
Ул хъапуна раккахъди вун ушучира,
Мехъун цаб алгъахъуна вас алчархьасе.
Ул хъа пуна тIагарихъди вун ушучира,
Чал хинзазив ярхIуна вас алчархьасе.
Агь зе хIур, зе хIур, зе хIур
ХIейиф кIвалас вес ле вун
Агь зе Ватан, ккане зе хIур
ХIейиф атуна вес ле вун.
Эльмира Каидова, Буршагъ
