Ерид джилар, ерид завар лап зурба кьуватилди яратмиш акьу задар э тIабиIети. Ппара ая ме завар-джиларил багьа савкьатар. Мебурикес ке багьа савкьатна девлет э: дуньяйин ислехIвел, тIабиIетин сакинвел, инсандин Iуьмур. Гьелбетта ме курар асулу э гьер са джурейин шартIарилас. Амма ислехIвел ке ппара асулу э нехIс инсанарин фигIилдилас. Хье хIа яшунин инсанари нехIекьди дава агъаф, нехIс инсан рекъуьъра гьучидирхIурай пуна.
ИслехIвелдин кьимат мус хьучира ппара хIаф э. Дадарин хIа дегIви ккиркIуна са асирдихъ хъучархьай айчира, мехIелдис ме гъалибвелдин рекъуьъ чиппин джигьил джанарна багьа савкьат иде Iуьмурар йи аскерарин ттурар кIвалас ушуна адава. Ичира магьа хаб ая хье джигьил джаванар мишттин дегIвин къазаматин рекъуьъ.
ДегIвибуриъ ишттарак акьуна аде инсанарис мусра кканвейдава чиппин дегIвин рекъуьхъас кIвал акьуна ахъакьас. Къикъи аве мебурис ме кардихъас ахттилатар. Амма чиппин йиркIвариъ меркIвар суман цIуппи атIуна амилгванде ме вакъиабур. Зе фикирдилди, лишттин Iуьр аве дегIвин ишттаракчибурин йиркIвариъ, вахттар ккеттушучира кехIей, аладавереф. ДехIела э мебурис алтухъ ахъакьасра дакканф. Чиппин суман джуреттарин йиркIварира Iуьр адархьурай пуна.
Фиппур пучира, хьинра сукъурар дава. Хьесра аргва ме ишттаракчибурин багу кIиларин джандил алвере гъамна дард. Гьер са зурба игитин кьабахъ миласра зурба дадна баб хъаве, ме ухIуна хIа акьуна, мис тербия йина, ме ягIа гьеме даражайиди агъадивуф. Хъаве, шиниккварин кIен – кIил аркьа идеми суман, хал кIили гъаре хизанра.
ЯгIа хьин гъургъасе хье Агъул райондиас иде Украинайиъ аркьая СВОйин ишттаракчи Омаров Кьулбан ХIеджиевичахъас.
Кьулбан ХIеджиевич са агъзурна ерчIу вершна муйцIурна еридпе исан хьибцIурпе июльди Гъваарин хIуриъ ХIеджинра ХIабабан хизандиъ хуне. Махьтаб ккиркIуна, цIемуя ис хьухаб ме ушуне армиди. Учин аскердин бурдж бегьем акьуне Кьулбана Москвайиъ. Мебурин хизандиъ ая хьибу кIиркIна Iу руш. Дада рекъерил кар аркьай, баб дояркавелди лирханди, библиотекайиъ кар аркьай, чиппин багайин ягъ аркьай ухIай уйи мебури гIуьфу шиниккв. Са нехIс ягъа маларихъ ушу усаъ дад кIине мебурин цIайлапан киркьуна. Музе шиникквар гIуьфудара архьуне бабан гардандиъ. Зурба дишагьли э ме, учин дардна гъамра, четинвелара гIанаъ икIуна, учин валадарин кIилил дадвелра бабвелра аркьай ухIуна хIа акьуна, мебур дуз рекъуьъ ихьуна арайил акьуф. Учи аркьадегьен джуре курарихъди ХIабаба махьтабин мерттхьунра училди гъушуне.
«Фидегьен азият ичира, миштти дакьухаб верегъилди адавуйи. ЯгIа ме четинвелар алттархьуна зун сакин хьу вегIдайи зе йиркIураъ атIуная кIиркI. Нандиъ айчира сагъ – саламат хьуна адирай хье джаллабурин шиникквар», — агъа Кьулбанан баба.
Кьулбанан учин чIаларилди, дадан ватандигьас, хулагьас варха хьугуна дала гъавурдиъ архьайдава ме чIаларин мегIна фидегьен хьес хIа ичин.
«Джурейи кьимат ирцIанде багу – кIиларин, дусттарин майилдисра, хизанарихъ шиниккварихъ, бабахъра джурейи ул хъархьа. Ме зе цIае ишттараквелди зас ацIуна цIае дарсара йиная.
Мисаъ ая аскерари гьертти училас асулу иде кар йиркIураастти акьас алучIа, учин ватандис иджвел хьурай пуна. Курара пугуна, гьелбетта гьерттил гьер джурейинттар алчархьа. Нагагь чун зе фикир фи э пуна хабар гъушучин, зас кея гъам зе яш хьуна бабанф, зе хизанар, шиниккваринф э. Амма ватандихъасра зе гъам чIукь дава. Фидегьен ягIа зе ватан ислехI хьуна авадан хьучин, гьегидегьен зе шиниккварин, хуттуларин Iуьмура авадан хьасе», — ахъаркьа Кьулбан ХIеджиевича.
ЯгIайин ягъас Кьулбан, йирхIунар хьуна, Астраханьдин госпитальдииъ хьуне, хабди Пятигорскдиъ санаториъра хьуне. Гьал сеIети иджи арайил алчархьасттегьен хуладира фартая.
ХIуриъ михъ ахъутIуна ая баб, хизан, Iуд бицIи шиникквар.
Фи ахттилатар аркьа чве рушана кIиркIа дадахъас пуна хабар гъушугуна, Лимуната джуваб акьуне: «Гьелбетта шиниккварин ппара ул хъархьа чиппин дадахъ. Фидегьен телефонариас гъургъучира, адина удигь гьай кканде мебурис. Чин хIаттари че фикирар йиркIураъ атучира, бицIиттари вартт агъихьа. Телефон акьудегьен, бала ве мебур шаб хулади агъай. ЯгIа – багагь рукьасе ме чахъди. Шиниккварин йиркIвара сакин хьасе».
Паччагьарин йиркIварис рехIми йирхIуна, дегIвибур ккиркIурай. Гьер са джигьил чиппин хизанарин кIилил сагъ-саламатилди хьурай.
Салихат Малагусейнова
