Ме сеIети агъуларин са хIура сакинди адава, зун агъай аяф хуларин курар аркьай, Iурдис хIезур вей.
Са вахттар хьуна уйи агъуларин Iурдис угулар гъуянди угас, гIагъвей амии камазардалди гъара аркьай и, гебур гьудуркIай чаб гIайшуна саIуйис гIай гъуйуна гIагъайи. Алтухъ вахттара ушундава мактабари, идарабури гъуянчира халкьди нагагьра гъуланди андава угулар. Ппара унихьа инсанарикес багьа э пуна. Багьа ичира чара акьуна кканду Iурдис . куппар угай Iурд алдихьас хьасттава. СаIу исар э агъулар гIавей лезгибурин, табасаранарин хIурариас чиппис машинариъ ахъуна кIурар гъай.
Са пай инсанари гъуланде Газель машин кIурари ацIуттар ери-муя агъзур йина. Ге аттархьа са тонна угулдин кьимат. Са тонна угул далара агъа инсанари са машин кIурар иджи э. Машинар хъаяттари чиппин машинара фай ушуна кумакра хъай ацIас акьуна кIурари гIагъве. Машин хъудаваттира кегьей машин хъая учин илдешас кумак акьуна, гис кIурар гьуркIухаб учисра гъарегъилди аркьа кIурар, е гьавайи аттархьа гис гебур, е бензинин пул йина, гъа ги учис Iурдис уга кIурар.
Хье райондиъ газ адавагуна, Iурдара цIуппеттар идегуна угафра ппара ккан ве. Гиштти идегуна са машинилди, Iу машинилди кIурарин алттархьайдава. Е удигь Iурдин хъамилгу кIурар ай кканде ве е хъара гъас ушуна кканде кIурар. ЧIукь кьимат йина кканвейи багъарарин эесибурис гебурин багъ кIураригьас мертт акьастти, гьал аргвай ая гебурис кьимат тин пуна дафайшучи, кIурар амилгванф, амма багъара мертт акьуна кканверегуна рукъу кIураригьас, мушат аркьа кIураригьас, ге кар гебурил чиппил алчархьа. Ге кардихъас кIурар гъас гIавере агъулас гьал кьимат дайина гIачархьай хьуна ая кIурар.
Цулин сакин дуьяйиъ йиркIв алийичи е дархъ-бархъ ахьасе тIабар адарцай, е бензопилайин ун ахьасе хIурил кIурар кьатI аркьай. Лихуб идже кар э, са ягъан джафа акьуна машин фай гIайшучи яри- муя агъзур йисттава вун кIурари ацIу машинигьас, фидегьен ачушучира бензинарис ге кьиматин са пай хьунара ве джибиниъ илгванасе.
К.Мирзоев
