Цулин мекIерна хьидин гашар гьакIанди агъа гафарар дава. Цул Iурдихъди афадарку вегIда э. ИдехIела э мегуна аязара ппара вереф. Са-са вахттари гьава суварикк ккея хIурариъ лап цулана димари хIа ибхьера кехIей угъа. Ме иса цул ибгIаф хьуная хье гьавабуриъ. Цул ибгIа хьугуна, инсанар бахил ве, фас пучин, ме вахтт Iурдис хIезурвелар аркьа вахтт идехIела. Дуньяйин гьава ачухъ хьугуна, инсанарис мугьлат ирцIанде, пичариъ цIабурар аркьаттарис кIур акьуна ахъиянас, Iурдис мал руккуна арайил акьас. Ахиран вахттари ме курарис ппара фикир ирцIанде инсанари. Iурдис къафун ахъийиб джаллайин вазифа э.

Миштти идегуна, инсанар цул фачадаркуф аваранди аве рукка малдихъас руцай. ХIурариъ аяттарис суман, шагьурариъ аттарисра къайгъу дивуна кканве рукка малдихъас. Джаллайи ккан аркьафра джигьил мал э. Фас пучин, яккра ширин ве, дахи руьхьейра э. Садихъди хIа мал руккуне пуне агъай, икIа усар адавайра дава гьал инсанарин. Авала суман бицIи холодильникара дава хъаяф, садихъди са мал авередегьен хIа морозилкабур хъудаваф нагагьра андава. Ме кар бадалди ме хIа морозилкабур хьуна ппара идже хьуная инсанарис. Фи кканчира ругъас акьуна ухIас вере шейъ гереквелдис ахъуна арта мисаъ.

Ме садихъди хIа мал руккубра ппара гъил итIуб ве инсанарис. Сагелай рукк, хабди яккар кедакь, машиниас йирхI, ирккар ккея усарикес тикабур акье, рукъас мугулар акье. Гьемиштти гIанар-джанаринра э, рудар IуьчIан, кьелаъ икI, хаб хьеттилас йирхI, уц агъихь, хабди машиниасра йирхI. Мебур кидавай, хъара ададарцуна атуна рудар ацIуттара аркьайра алучIа, сасадари йирхIу йиркIвар-лекIер икьу ласкара аркьа. Фидегьен гъил итIучира, мебур арайил аркьай, хабди хьес ягIа са ягъа, Iу ягъан джафайихъ хъуттудурфуна, кIилин Iурдис къафун идеф хьин ахъиланди аяф. Ккулинвел дакьуна, ве хизанарин багайин ягъахъас фикир акьуб, гьер са инсандин эесивелра э, зурбавелра э.

Батитай Габибулаева