Хьид ке ккане вахтт э инсанарис. Дуньяйин кIилди багвар ачухъ вере вегIда. Инсанар суман нахширара гъузуна аве хьидихъ. Фас ичин фикир ве, хьид адегъилди инсандин йиркIураъ ая гIезабар ачухъ вереф суман ве, кея итталарис рехIми вереф суман ве, кIилди аядегьен четинвелар гьаттархьаф суман ве. Амма хьидин иджвелихъ зарар, четинвелар, хатIабур хъаве. ХIапай мишттин зарарин курар вереф инсанарин эхIттиятсузвелдилас суман, ая тIабиIетилас асуллу иде зарара.
ТIабиIетилас асуллу зарар хIапай вереф хьидана цIайлапанар ата вахттуни, Iае кулакар аттархьу вахттуни. ЦIайлапанарилас вере хатIабури хIапай зарар ирцIанде джиларис, дарарис, нахширарис, хъара инсанарис. ЦIайлапанар ата вахтт ягъуй суман верефе Iуьшуйра, инсанарис хабар дава вегIдайи. Миштти идегуна, мункин э нехIс хьуна цIа йирхIу мукьарик лап хIа цIабурар керхьуб, хатIабур, зарар хьуб.
ЦIа уч Iа шейъ э. Эгена са бицIидира ул алдихьучин, цIабури ппара зарар хьас аркьа, угас аркьай хулар, хIа дараматар, мукьар, джилар, дарар, чIирариъна дарариъ ая нахширар. Мишттин нехIсвел ве хъара инсанарин эхIттият, алгъузуб дахьугуна. ХIа зарар ирцIанде тIабиIетис суман инсанарисра. ХатIабурис багьана вереф хIапай инсанарин эхIттиятсузвелди суман, цIабурар ишламиш акьубан къайдабурихъ хъучадавехIела. Хьид адегъилди, инсанар хъучучIа гьертти учихъ хъая багъарихъ, хуппурарихъ ахъаджихIас. Цулана кимилгу гьаттдадивуна аме лазимдава IуькIер, къалагъанар, чlирхIар угас аркьа. Эгена кулак ая вахттуни, эхIттиятсузвел акьуна цIабурар акьучин, мункин э хатIа хьуб.
ЦIабурари ппара зиян ирцIанде чIирарис суман багулив ая дарарис. Хъара са-са инсанари угас аркьа чIирар цIае Iукь агъучIас пуна. Гьелбетта миштти чIирарис хъара ппара зарар ирцIанде. Угу чIириас хаб цIае джурейин IуькI агъучIагунас ппара гагь ве. Хъара эхIттиятсузвелди зарар ирцIанде бицIи нахширарис.
ЦIабурар керхьубас багьана гьер гъилди вереф. Мишттин кар э инсанар гъузуна аве кьарар кидавай, мус Iурд алттархьасегьан пуна, мус дуньяйиъ ибгIавел хьасегьан пуна. ХIапай инсанар чиппин хьидин курар акьас, са пай инсанар айчIвас чIирариди чиппис рехIет акьас. Фикир дайина эхIттиятсузвелди аркьа цIабурар, фадихьа папрусар.
ЦIабурар керхьубан нехIсвелар хьас мункин э хулаъ ая бицIи шиниккварин эхIттиятсузвелдилас, ишламиш аркьа газун, ттукун пичарилас, хIурариъ ая инсанари кIурар уга пичарилас.
Гьергелай, са бицIи цIабур керхьубаас ппара зиян ирцIанде инсанарис суман хье тIабиIетисра. Миштти идегуна, хIа инсанари аркьа эхIттиятилди хъучаверегъилди цIабурар акьубахъ, хабди хатIабур дахьас, хье дардуман тIабиIет ухIас.
ХIаттари ягIар аркьай кканде шиниккварис чIирариъ, дарариъ цIабурар кихьубалас фишттин зарар вейчин. Хъара ягIар аркьай кканде тIабиIет ке хIа девлет э хьес ме дуньяйиъ йинаяф.
Наибет Гасукаева
