ДегIви… Мус хьучира ме Iари са гафуни бегьем гучI ихьай аве инсанарин йиркIвариъ. Инсан дуньяйил яратмиш хьухаб мич, мебурин хасиятиъ бехIсарна нафсар сакин хьу задар дава. Тарихди учин аларцубар вахтт гIартай тикрар аркьа зад э. СеIети ислехIвел гъалиб хьучин, сеIети хаб дегIвин завкъ гъалиб ве. Са несилдин йиркIвар сакин хьуна, дегIвин гIезабарна зулумар хум вес хъучархьайдава, хаб сасра залум йиркIвар ая нехIс инсанари цIае кIилиластти гIаттгъа дегIви. Са чIалалди, сагелай дегIвин Iайвел агу инсандин йиркIураас мин хьил мусра гуланасттава. Мин джандиъ нафас амедегьен гагьди, дегIвин Iуьрна гIезабра амилгванасе. Мебури инсан эмкIериас агвар аркьай хьунара сакинди артайдава.
Гьелбетта гьеме кардихъас э хье хIабабари, хIададари са чIал пуна, Iудпе чIал агъагунас, дунья ислехI хьурай агъаф. Ме ахттилатар мебурин лап хIа дуьгIе э. Чиппис агудегьен гIезабар, азиятар, гашар – мекIер, Iайвелар чиппин гьал кегъархьая несиларис дагуб бадалди, мебур хIезурди аве фи кканчира акьас. ДегIви агу инсандис ме рекъуьъ учин Iуьмурна джанра пуч акьас Iегвал хьасттава.
Гьелбетта гьер са дегIви, уч бицIиф хIаф дапуна, зулумат э.
Гьемишттин дегIвибурин тарихарикес ке хIа тарих э дадарин Ватандин хIа дегIви.
БатIарди фикир акьучин, хIекьдан Ватанин хIа дегIвин зарар гьер са шагьурдис, хIурис, хизандис, инсандис киркьуне. Илгундава са хизанра, хулаас са инсан дехIера ме дегIвиди дафайшуф. Амма ягIа хьин, гьалдин несилар, хье игит хIададарин Iуьмурдихъас фичира ягIар акьас алучIугуна, хье дадар-бабарифас вейдава хьес алтухъ кумак акьас. Фас пучин, мебурис чипписра лидегьен фера ягIай авейдава.
Хъара четин ве, нагагь ме инсан дегIвиас дарукьуф сара идехаб. Мишттин аскерарин санра лап ппара э. Гьеме кардихъас э тиъ Гъалибвелдин ХIаягъ багу вередегьен, ягъ ягъалас алтухъ ве ватанперасвелдин мегIракабур.
Ме мегIракабурин мегIна э хье хьасмиде несиларис ме игитарин гьунарвел ягIар акьуб. Гьемиштти засра ппара четин э зе хIададахъасра фичира джикIенас. Фас пучин, зе хIадад дегIвиди верегуна, зе дад хьибу ягъан шиниккв и. Ададанра гIуьфу ис дала давуйи. Гьелбетта мебурис чиппин дадан хъуьсура кехIей кIвалди андава. Е дегIвин вакъиабур агуттара, ягIаттара андава.
Зун алучIасе зафас завал акьас хьу ягIарвелар чвахъдира рукьас акьас. Ппара файшуне ме дегIвиди хье халкьра. Джаллабурин джалгайигI гIай файшуне зе хIадад Абдуллаев Шафи Абдуллаевичра, учин бицIи чу Iелира хъай. Хуне ме са агъзурна ерчIу вершна садпе иса Къуругь райондин Хвередж агъа хIуриъ ГIебдулагьанра ХIуьрин хизандиъ. Шиниккв вахттара лидегьен рехIетти ушундава мин. Фас пучин, вахттар четинттар и. Са кьацI гуни IуьтIуб бадалди кIесттегьен загьмат дивуна кканвейи.
Хизан акьуне ми хубджи кьанайи. Шафинра Салиматан хизандиъ хьибу шиниккв хьуне, Iу кIиркIна са руш. Руш ерхьи ваз хьуна кIине. Са агъзурна ерчIу вершна ягъцIурна Iудпе иса, бицIи кIиркIан хьибу ягъ дала давай, файшуне зе хIадад дегIвиди. Са агъзурна ерчIу вершна ягъцIурна хьибудпе исан декабрьдин вазала адине хабарин кIедж, Абдуллаев Шафи ун-хьил андавай гулуне пуна. Са гагьра ккеттушундава, бицIи чу Iелира кIине пуна хабар адине дадар-бабарис.
Хабди, са Iу вазарилас файшуне дегIвиди мебурин хьибудпе чу ГъазимехIемадра. Хулахъ хьедра хъударкуна, Iар акьуне даданра бабан йиркIвар. Бахттунис, дегIви ккиркIухаб ГъазимехIемад-адад сагъ-саламатилди адине учин ватанилди. Дадар-бабарин, багу-кIиларин шадвелдин кьадарна кьанигIет адавуйи. Амма че хIабабан гьер са ахттилатин кIил и хIададан ттур. ХIа дуьгIебур и гин дунья ислехI хьурай, чвас дегIвибур дагурай!
Зас чугъсагъул пас кканде хье хIададарис, хьес Гъалибвел къазалмиш акьуттарис! Фидегьен мебурин суратар хьес дагIайчира, мебурин игитвелар хьес мусра хум хьасттава.
Салихат Малагусейнова
