ЯгIа зас кIвал акьас кканди ая хье авалдихъас мич ая дадарин гIедат. ЯгIайин ягъа руш шувас гъарегуна, дадан хулаас ирцан шейъ-шуьй кедавай Iеле задара ппара ахъартай аве.

Амма авалдин вахттари алтухъ шейъ хъавейдавуйи, IуьтIубарикес са тIабакI Iесидара, Iу кьутIурна, са Iуьфер ирцIанди.

Ме кьутIурис хье гIедатилди агъа «рекъуьн» кьутIур. Дагъусттандин хIа пай миллатарихъ хъая ме гIедат.

Удигьтти ме наврузбегдис сусан паттайиас лап хIа савкьат суман гъареф и. Наврузбегдин джалла дусттар завал хьегуна, мебурис адарцуна агьиланфи кьутIур.

Агьалра кегьей сус файдигуна, Iелеттар ппара авейчинра, сусан кьутIур нахьи агъай джаллабурин ул аве рекъуьниъ. Гьемиштти идегуна, хьедегьен алучIа кьутIур ахъатас сусахъ.

Ме кьутIур аркьагуна кканве: тIиши гIур, рукъу якк, батIар нис, гъурагъалар, мертте ччам, хIезур Iесида.

ГIурикес алттирхIа чукь суьве кея джарар ахъуна гIанаъ гъурагъал, нис, яккра алихьуна ччамра дахи-дахи аркьа шутI гъурагъал ададавес.

Хабди цIа яваш акьуна уджа хьураъ. Уджуб агъатIугуна ададивуна арта батIарди дехъестегьен. Ругъу кьутIурил алгьарта Iегвал давай ибгIа Iесида. Iесида цIуппе хьугуна икIуна тIабакIиъ рекъул аркьа сусахъай цIае хизандилди.

Салихат Малагусейнова