Ахьуная са хIуриъ яшамиш вей са Аракан агъа гIурчахъан. Са хIа муг ацIу пеIэр хъай хьуная михъ. Керхьуная ме пеIэрик са Iемалар кея сул. Араканра лидегьен башттанф хьуна адава. Фай ханджалра Аракан ккекьуная сулас. Сулахъ гъузанас ппара гагьди алчархьуная мис. Гьелар суман суппеларна руджра джирхуна, учIуная ме рекъуьъ пеIэрин гIурч акьас.
Аракан хIезурди гъузуна ахьуная михъ. Агъдивуная Аракана къаюас ханджал, йирхIуна хъайхьуная сулан рудж, уч фатуная найич кканчира ях пуна.
Дард хьуная сулас, рудж хъундай илгухIела. Адаркай хьуная ме дарариъ, сувариъ Iешай- Iешай:
Вай-вай, вай-вай!
Зе гIудул рудж!
Вай-вай, вай-вай!
Зе ттур ае рудж!
Шиберин кучарарис ухшар иде
ГIудул рудж!
Унихьуная мин Iешалар булахихъди хьед гъас адиная шиберис. Чиппин чIарарин хIа гафарар аркьай унихьуф, Iегвал хьуная шиберис ме сул. Гьерттин кучараригIас са-са къизил чIар гIатIуна, акьуная мебури сулас рудж.
Са ягъа адаркуная сул ге рудж хъай, Iу ягъа адаркуная. Хуппай хъатIуна ахъатуная зазарин куларигIди ме рудж, Iешалара аркьай хаб ушуная дагьарарил алдаркай, дараригI гIадаркай:
Вай-вай, вай-вай!
Вай зе ухьттан рудж!
Вай, вай, вай!
Вай зе рекIве рудж!
Изагурдин кулагъарикес акьу
Накьишарис ухшар иде рудж!
Унихьуная мин Iешалар Изагурдин шиберис. Чиппин накьишарин хIа гафарар аркьай унихьуф, Iегвал хьуная мебурис сул. Алгъакьуна кIазун хаятIарил кулагъар, акьуная мис лап батIар рудж.
Iу ягъа адаркуная ме учин кулагъарин рудж хъай, хуппай ихьуная ге са уьркIе ачIаъ, уч ушуная хаб Iешалара аркьай, учин ханджали хъайхьу руджурахъас:
Вай, вай, вай!
Вай зе гIудул рудж!
Вай, вай, вай!
Зе кьимат ада рудж!
Шамхалдин тIаратIарис ухшар иде.
Зе ттур ае рудж!
Ушуна пуная шамхалдис рудж хъудава сулахъас, шамхалдин тIаратIарин хIа гафарар аркьай суварил аларцвай, дараригI гIаруцай Iешаттихъас. Шамхалди буюрмиш акьуная, тис дахи-дахи ке батIар парчайикес рудж акьуна, хъикI пуна. Са ягъа, Iу ягъа адаркуная ме сул парчайин рудж хъай, хьибудпе ягъа нецIун къирагъихъ хъая цIибцIул фадихьуная ми те рудж, экьуная къирагъихъ са гьавайилас Iешалара аркьай:
Вай, вай, вай!
Вай зе гIудул рудж!
Вай, вай, вай!
Вай ханджали хъайхьу зе рудж
Фи илгунф и учра, фи гIудулф и учра!
РагIуъ аве рагIун хIекьунис ухшар идеф!
Унихьуная мин Iешалар рагIухъандис, экIен кьур ругIай рагIуъ аяттис. Акьуная ми сулас гIурин хIекьукес са гIудул илгун рудж. Са задттилра рази деве сул, ахиркIил учис ккане суман рудж гIачархьуна шад хьуная. ХъикIуна рагIухъанди акьу руджра, гьуккай ушуная ме дарагIди. Са арайилас гъагьархьуная хабарсузди аттархьу кулак, далгъуна, кум хьуна ушуная сулан рудж. Iаре джагвар хьил амилгуная руджуран.
Хаб аркьай хъучучIуная сула учин мегIни-Iешал:
Вай, вай, вай!
Вай зе гIудул рудж!
Вай, вай, вай!
Вай зе пуч хьуна ушу рудж!
Унихьуная ме Iешалар даран куларигI гIучIуна, туфангра фай джинихьуна гIурчахъан Араканас. Алгъадивуна туфанг, йирхIуна кIиная ми сул. Алдахъуная ми кьудакь, акьуная учис бармакра, хуттулас руджуракес хIавра. Ма вас аркьафра пуна.
Батитай Габибулаева
