ЯгIа, 22 пе июльдиъ, райондин хIаттин Закир Каидован кабинетиъ хьуне совещание. Гисаъ гъадивуне гьер джуре суалар хье райондин гьавайихъас. Ппара еб ицIанди ая мактабарис, садикарис. Уч хъуттурфуна, агуна ая пуне хIатти Тпигъарин, Гъваарин, Гъудагъарин хIурин мактабар.
«Гъудагъарин хIурин мактаб ширар йирхIуб, джуре курар акьуб кидавай отопленира аркьая, ге кар аркьая спонсорди. Джалла шейэр гъуюна хIезурди ая ге кардис. Ге курар кидавай ме мактабис Iу меценат гIайчIуна ая, Iударира хьибувершна гIифцIур агъзур манат сайира сасрайира ицIанди ая ме мактабис ремонт акьас. МайцIур агъзур манат хье райондин бюджетиасра ая гебурис гIанар цалар дуз акьас гIадихьуна. Арсугъарин мактабисра гIайчIуна ая кумак аркьа инсан. Аме мактабарисра кумак аркьаттар джикIенас алучIасе», — пуне Закир Каидова.
По сейсмоустойчивости агъа программайилди Тпигъарин хIуриъ цIае мактабра акьас гIачихьас кканди ая хье райондин хIаттис. Гъадивуне ахттилат хье алттушу форумдин хьу иджвеларихъас, бизнесменар ая агьал хье райондис хайир верегъилди налоговый учетиъ гъузуттар. Дарманарин обеспеченихъас гъадивуна уйи суал.
«Ге кар дуз акьуна ая», — пуне хье райондин больницайин главврача Рамис Курбанмагомедова.
Тпигъарин хIурин кавхара гъадивуне удигьайин загоскотиъди вере рекъ чIирди ая пуна.
«Рекъер акьас ттарахттур адава, гъургъуна ая зун Нураттинахъай, частный гъарегъилди», — пуне Замир Габибулаева.
«Ппара читин суал хьуна ая хье рекъер, скорый помощдин машинарсуман хьуна кканди аяф э хье дорожникар, магьа фидигьен гагь э хьин совещанибур аркьай, е мич вейдава, е техника хъадава, кIилин предприятихъ частникдихъ суман э хъаяф техника. Мишттин кардикк ккихуна ккандава: хье сувар, хье дагьарар угъалар угъучи адархъаттара, адавереттара э. Ге кардихъ хъучавесе зун», — пуне Закир Каидова.
Скорый помощдин са машин рукьафсуман хабарара хьуне мисаъ, хье райбольницайис минздравиас. Iекварин читинвеларин хабарара гъадивуне. Гъудагъарин макктабис ицIанди ая са инсанди трансформатор 250 квт аяф. Сайисара хье райондис ицIанди ая 400 квт ая трансформатор, уч Подмосковье аяф э ге, тера файдина кканди ая мич.
«Хье агьал Iурд хъучучIагунас, ттук хьехъ хъуе-хъудава источник э энергин. Газар хьехъ хъадава, балунаринттар кидавай. Цулин-Iурдин вахттарис акьуна кканди ая хIезурвел ппара зурбадалди. Ме иса агърукьаттар акьуна, капитальный ремонт хье сетярин акьасе сасра иса. Энергосбытин инсанара адина кканди аяф э хьеалди ая адава энергин источник ттук идехIела пуларин ттариф духIуба акьуб мункин э гебури хьес», — пуне З.Г. Каидова.
Гъаре чIирхIарихъасра гъургъуне мисаъ. Миссиарин хIурин кавхайи пуне, чIирхIар гъайдава пуна. Райондин хIатти уч гъургъун ая пуне чIирхIар гъареттарихъай, гебурин чиппин читинвелара ая чIирхIар файшубахъас, минприродайиас арайил аркьагъилди акьуне ге кар. Ме хIефтайиъ араил аркьагъилди вей аяф суман э.
Хьирагъарин хIурин зарар хьу инсанарисра ягIа-багагь пул ицIангъилди хьуна ая хье райондин гъилихъ хъаяф.
К.Мирзоев
