ЯгIа, 5 августиъ, райондин хIатти Закира Каидова завал акьуне Тпигъарин хIуриъ ая идарабирин хIаттар.

Совещание хъучучIуне идже хабарихъас: Каидова хуруне Дагъусттандин Минстройдин кедж. Гисаъ пуная чухсагъул Агъуларин райондис иджи кар укьубан «Формирование комфортной городской среды» агъа проектигI.

Завал хьеттар гъургъуне цифровой телевиденихъас, мактабиринра садикарин ремонтихъас. Завал акьуная комиссия ге кардил алгъузуб бадалди. Акьу кардихъас джуваб йина кканди ая 10 пе августиъ.

«150 школ» агъа проект фиштти вейчин ахъакьуне ЖКХйин начальникди Шабана Шабанова. ПроектигI гIачархьуная ЧIаарин мактаб. Шабанова курар вахттуни аркьая пуне, материалар файдиная, 12 инсан лихандея 2 корпус аркьай.

ЧIирхIарин суалра гъадивуне, ме кардихъас ягIа-багагь акьасе совещание хIурарин хIаттарихъай.

ЖКХйин начальникдис райондин хIатти буйирмиш акьуне дахи дивас Iеквар джалла хIурарин кючабириъ.

Хъара ахттилат хьуне кючабириъ арайил алдава мукьариъ гъурзар акьуна мушат аркьая траспортихъас, Iукер файдина ккане вегIдайи ппара ацIас акьубахъас машинар, тротуарарихъас.

Са ягъари аларцуне галарил: сур мукьар иджи айчин, сасрабур – адава. Иджи адава мукьар арайил акьас йисе вахтт. «Идрабирилра алгъузанасе, — пуне Каидова, — директорарис акьасе аттестация мактабар ремонт акьухаб. Курарилас алайкуб матлаб дава, ккандеяф иджи кар акьуб э».

Хъара арайил алди уйи агропаспортар акьубахъас суалар, хабди гебур фачиянас ЛПХ, КФХ, СПК, ИП.

Гъургъуне арчIуна цIае кIилиастти акьуна ккане цIуьре 5 зданихъас, гебиригI гIачархьая Агъул райондин администрацин здание, гисаъ хьуна кканде 3 этаж.

«Мишттин программабригъ гIачучIас хIезурди ая сасра районар. Хьин дакьу курар хьехъас сасрабури акьасттава. Хьин вей кканде министерствобириди. Джаллабири фикир акьуна кканде хье район гIачихьагъилди программабригIди», — пуне Каидова.

К.Мирзоев