Дагъусттандин хIатти Сергей Меликова учин телеграм-каналдиас гъургъуна кIвал акьуне август – сентябрьди 1999-пе иса хьу курарихъас. Ме вахттуни Дагъусттандилди хIевалат хьуне душманар.
«Ме августин ягъари, ацIуна исар алттушуна айчира, хьин кIвал аркьая республикайилди бандформированибур алчахъу вахттар.
Гьер джурейин ацIуна яракьара фай, дуньяйин гьер багварихъас завал акьуна алчагъар, диндин ахттилатара аркьай, адине хье республикайиди. Мебурис кканхьуне мисаъ чиппинхъди джалла гудж акьуна хъучадивас, Дагъусттандиъ гIахъубур акьас. Те вахттуни мебури аркьаттар аргвай, ке хIа ттур ая назумчи Расул Гамзатова чIалар «Мебур адинаф Дагъусттандиас Дагъусттанагьлибур адикас» йиркIурал акьуне Сергей Меликова.
«Алчархьу вахттуни хье инсанари хабра агвар акьуне чиппин цIуппевел, РоссийгI экIвас кканди аяф халкьдис», ме арайи дагъусттандин инсанарин хасиятарин цIуппевел агуне джалла дуньяйис.
«Гьалдис уйи хIуьджатар, дакканвелар, гиранвелар хум ушуне. Агъзурарилас вартт гъайшине вилаятин сакинвел ухIас. Халкьдин зурбавелдихъас, игитвелдихъас сагелайна Iугелай дава хье хIуькуматин Президенти Владимир Владимировича Путина пеф. Те ке Iайи четин вахттуни адина уйи ме Ботлихдиди, ушуне ме ке Iайи дегIвибур ая мукаридира. Гьете хIаттин багухъас хьу хIуьлмат ягIара аме хьехъди.
1999-пе иса хьу курари агвар акьуне хьес, дуз рекъуьъ ая халкьдин варттал гъалибвел гъушанас давереф. Агьалра гъавурди ая хьин ме кардин. ЯгIара хье аскерар, джигьилар, чиппин разивел фай ушунаттар специальный операциди, зурбадалди гъузуная хье хIуькуматин сакинвел ухIай. АцIуна тоннабур гьер джурейин сурсатар, аликIа кунар, дарманар гьикая хье инсанари Украинайин акуьшу мукьариди»,- пуне Сергей Меликова.
Хъара тIалаб акьуне хIатти инсанарикес гьалдин хабра гьер миллатаринра регионаринра арабуриъ хIуьлмат – нуьхIуьбат ухас.
«Мус хьучира, хье миллатарин арайиъ ая нуьхIуьбати хьин цIуппи аркьафи, гьалдин хабра фиттира арабуриъ архьас атуна ккандава. БицIи-цIуре ая гиранвелар дахи хум весе, илгванасе хIуьлмат, нуьхIубат милаттарин арайиъ. Фи кар-лихун алчархьучира, хьин цIуппедалди гъурзанфе хье хIуькумат бадала»,- пуне Дагъусттандин хIатти.
Луиза Гусукаева
