Агъул райондин хIурариъ сур махьтабариъ дарсар ирцIан мегIелимарин кьитвел ая. Гьемишттин кьитвелдин читинвеларис кьанди хье хIуьукуматиъ аттархьуне цIае программа «Земский учитель» агъаф. КIвал акьасе хьин, «Земский учитель» агъа программа арайил акьуне 20-пе февральди 2019-пе исан.
Гьеме программа арайил акьухаб, хье Агъул райондисра федеральный бюджети йине мункинвел кьабул акьас гIуьфу мегIелим. ЯгIайин ягъас хье райондиди ме программайилди кар акьас адиная хьибу мегIелим. Сад Хьирагъарин хIуриъ обществознание агъа дарсар гъареф, Iуд Буршагъарин хIуриъ- сад химина биологин мегIелим, сад английский чIалан. Хъара Iу мегIелимдис сара талаб йиная — Типпигъаринра Курагъарин хIурарин махьтабарис математикайин мегIелимар гьикагъилди. Мункине вере иса мебура арайил хьуб.
Буршагъарин хIуриъ английский чIал гъаре мегIелимдин мус хьичира кьитвел аяфе. 1994-пе иса ме махьтабиди кар акьас адине Гусейнова Лариса Нажмудиновна агъаф. Са иса кар акьуна, Лариса Нажмудиновна айчIуна хIуриас шагьурди ушуне, хабра халин гагьди Буршагъарин махьтаб хьуне английский чIалан мегIелим адавай. 2013-пе исалас 2015-пе исалди рукьуна кар аркьай хьуне Каидова Зульмира Камбаровна. Зульмира Камбаровна декретный отпускайиди ушухаб, сара ме махьтабиъ кар аркьа мегIелим хьундава. Агьал Зульмирайи кар аркьая Гъудгъуларин махьтабиъ.
2020-пе иса Буршагъарин махьтабиди адине кар акьас, «Земский учитель» программайилди, цIае мегIелим английский чIал гъареф Агабекова Фатима Тажудиновна.
Фатима Тажудиновнайин бина э Дербентский райондин Салик агъа хIуриъас. Хуруне махьтабиъ учин хIуриъ. Махьтаб ккиркIухаб, учIуне хурас Дагестанский Государственный университетиъ ФИЯ (факультет иностранных языков) Махачкалайиъ. Университетиъ Фатима Тажудиновнайи хуруне Iу чIал, английскийна немецкий. 2017-пе иса хурубар ккиркIуна, Фатима Тажудиновна учин хизандихъай ушуне Москвайигьас варха дава Иваново агъа шагьурдиъ кар акьас 29-пе махьтабиъ английский чIалан мегIелимвелди. Гьемисаъ ми кар акьуне са иса. Са исалас Фатима Тажудиновна айчIуне декретный отпускдиъ. Хабди ме учин шиникквара хъай 2020-пе иса хаб адине чиппин хIуриди. Мисаъ адегъилди ми ккан акьуне цIае аттархьуна программайилди кар акьас Табасаранский райондиъ. Учин лазим вере кIеджара фай, октябрьдин вазала 2020-пе иса Фатима Тажудиновна ушуне Министерствойиди ме программайигI гIачучIас. Министерствойи мин гIерза кьабул акьуне. Амма гIерза е 145 инсандикес Фатима Тажудиновна хьуне ке ахиранф. Миштти идегуна, е Табасаранский райондин, е Хивский райондин махьтабариъ мис мукь хьундава. Ахира мисс гьучихьуне Агъул райондин ФитIаринра Буршагъарин хIурар. Фатима Тажудиновнайи ахъакьуне:
«Агъул район ая пуна унихьучира, амма кьацра ме райондихъас, миса ая хIурарихъас зас хабар адавуйи, е ягIафра давуйи. Ичира зун гIаттивуне Буршагъарин махьтаб. Удигьай кар акьас адестти ме хIуриди, зас лазимди уйи повышенин курсар. Сентябрьдин вазала зун хуруне ме курсар. Хабди, октябрьдин вазала, зун зе ададахъай адине Агъул райондиъ кар акьас ушуна кканде мукь ягIар акьас. Зе адад Хивский райондинра Агъул райондин военкоматиъ кар аркьая. Ке удигьай чин адине Типпигъди, Буршагъарин хIур ая мукь ягIар акьас, мисаъ фикир хьуне зе гьеме мукь идеф хьасе пуна. Амма мисаъ ая инсанари хъара ушуна кканди ая пуне Кьушан-дерейиди. Ке ппара зе фикирди ая хиял, гъам те вахттунис варха рекъ и, хъара фишттин инсанар ая мукьуйиъ зун кар акьас вереф пуна. Сайишти Агъул райондин мукьар, хъучучIуна Магъу-дерейиас, пас даверегъилди батIарди ая. Буршагъарин хIуриди адегуна, зе фикир хьуне, яраб мишттин хIурар амегьан пуна. Садпе ягъа чин хъаттфайшуне Буршагъарин махьтабин завучди Руслан Шабановича учин хулади, эркьва хал алчархьастегьен. Ппара ачухъди кьабул акьуне чин мебури. Миса зун амилгуне са вазала. Хабди Буршагъарин хIурин махьтабин директор Алавдин Абдулмаликовича зас джикIине эркьва хал. Ме кардис хъара кумак акьуне Амирбег Мазиевича, мебурин хIурин кавхайи. Нагагь зас лазимвел ай шагьурди вес кканхьучира, транспортис кумак аркьа. Инсанар ме хIурин ппара ачухъ, хIуьлматлу инсанар э. Зун махьтабиъ кар аркьай магьа хьуная са исна сур, зас мехIелдис са багухъасра гиран, хиял акьуф адава. Махьтабиъ кар акьас са читинвел адава, кIилди ачухъвелар ая шагьурдиъ суман. Мисаъ ая шиниккварисра агьал мункинвел ая английский чIал ягIар акьас. Ая Iераб чIал ягIар аркьа мегIелим. Хъара зун мич адехаб, ягIар акьас хъучучIуне Iераб чIал. Че мегIелим э Багаудин Сиражудинович, Буршагъарин мазгитан имамвел аркьаф. Кьанди Агъул райондиъ хьуна уйи Дафттар хурубан бехIcунин маджлис. Ме маджлисиъ зун гъушуне садпе мукь Буршагъарин хIуриъ, хабди Агъул райондиъ хьибудпе мукь. Ппара рази э зун гьеме инсанарил, ме махьтабиъ ая шиниккварил, хъара захъай кар аркьая илдешарил. ЯгIайин ягъас зун зе кIиркIра файдине ме махьтабиди хурас. Зас пас кканди ая ппара хIа Чугъсаул джалабурис!
Наибет Гасукаева
