Роза Эльдаровайин ттур Дагъусттандин джемеIетис ппара гагь э ягIай. ЯгIафра ме Iари идже багулихъас. Къадпе асирдиъ ме ттур республикайин Iуьмурдис чишна хьуне. Ме вегIда ппара идже вегIда и хье Дагъусттандис.
Гьунарлудалди джигагьар гъадивай, спортин, джуьре усариъра кар удигьди ушуне. Эльдаровайн биографи Советский хIуькумат ая вахттуни чишна суман ий кар аркьа инсанарис. Мин Iуьмурдин рекъ кумыкарин авалдин хIурин зурба дишагьлин рекъ и
Аруцуне Роза Эльдарова Капчугайдин майданарихъас хъучучIуна Кремльдин гьавабуриди рукьуна. Дагъусттандин тарихдиъ ме садпе дишагьли хьуне Суварин Ватандиас хIуькуматин хIекимарин джалгабуригI гIачархьуф. Микес хьуне ДАССРдин Верховный Советин Президиумдин Председатель. Гъавурдиъ архьагъилди пучин, хье республикайин хIаф.
Эльдарова Роза Абдулбасировна са агъзурна ерчIувершна къана хьибудпе исан къана садпе декабрьди Буйнакский райондин Капчугай агъа хIуриъ нежбер Абдулбасир Эльдарован хизандиъ хуне.
Са агъзурна ерчIу вершна хьибцIурна хьибудпе иса Буйнакск шагьурдин ери исан махьтабиди ушуне. ягъцIурпе иса ккиркIуне. ЯгъцIурна хьибудпе иса заочно хуруна ккиркIуне Буйнакское пед. училище. Кар акьас хъучучIуне ме ягъцIурпе иса Буйнакский райондин В-Казанище агъа хIурин ери исан махьтабиъ, бицIи классарин мегIелимвелди: Зе хIа бахтт хьуне. Антонина Петровна агъа мегIелим айчIуна учин ватаниди вей уй. Зун бицIи руш ичира ме учин курар заал алчихьагъилди хьуне. Iуьш – ягъ дагъай ягIар аркьай уй чин дарсарин иде даваттар. ДехIела завас хьуне кар акьас, шиниккварира йиркIв алиланди заал. Ппара шад, идже вахттар ий мебур.
Са агъзурна ерчIу вершна ягъцIурна садпе исан мартин вазалахъас кар акьуне ме Буйнакскдин Военно – пехотный училищейин заведующаявелди. ДегIвин вахттуни госпиталариъ ая йирхIунар але аскерарис хулариди кIеджар ликIенас кумакар аркьай хьуне.
ЯгъцIурна ерхьидпе иса Эльдарова гIаттивуне Буйнакский райком комсомолдин секретарьвелди, ягъцIурна еридпе иса гьаме райондин ВКП(б) райкомдин секретарь хьуне. ЕрхьцIурна Iудпе исалас ерхьцIурна еридпе исалдегьен ДАССРдин Верховный Советин Президиумдин Председательвелди кар акьуне.
ЙицIу исалас алтухъ хьуне мин Дагъусттандин кIилиъ ай. Дагъусттандин аваданвел бадалди Роза Эльдаровайи зейдайи загьмат дивуне.
Чишнавел ий мин Iекьуллувел, зурбавел, мехIкамвел. Гьер багварин фикир хъавей михъ.
ХХпе асирди дуьньяйин сиясатдис лидегьен ппара ягIай адавуй мишттин зурба йиркIуран дишагьлибур, чиппин ватандин вакиларин джалгабуригI гIачархьуттар, — Индира Ганди, Беназир Бхутто, Голда Меир, Маргарет Тэтчер, Тансу Чиллер. Хьин бахил э гьаме бицIи джалгайигI хье дагъусттанагьли Роза Эльдаровара гIачархьубал. Роза Эльдаровайи зурба хьил атуне тарихдиъ, къизилдин хIерфарилди ме китабик учин ттур ликIина.

Салихат Малагусейнова