Июльдин вазалан 10 ягъа Махачкала шагьурдин Абубакарован куьчайиъ ая сквердиъ мегIрака акьуне. Ме мегIракайил дахъуне Российин Игит, Магомед Нурбагандовас памятник. Ме дахъуб бахш акьуне, Нурбагандов игитвелди кIина, еридпе ис бегьем хьубас. МегIракайил иштарак акьуне мин дада Нурбаганд Нурбагандова, республикайин хIатти Сергей Меликова. Нурбаганд Нурбагандов РФдин Госдумайин депутат э. Учин гъургъуб хъучучIай ами, хье региондин хIатти кIвал акьуне Iу агъзурна цIеерхьидпе исан июльдин ваз. Iу агъзурна цIеерхьидпе исан ме вазалахъас хъучучIуна Магомед Нурбагандовакес терроризмдисна экстремизмдис акси айчIубан рекъуьъ лап хIа чишна хьуф идеф.
«Магьа хьин ягIа Российин Игит офицердис, цIуппе, хIуьлдандин йиркIв ая зурба инсандис, Магомед Нурбагандовас памятник дахъуне. ХIапай милас асуллу и, мин зурбавелилди хьуне Дагъусттандиъ, кIилин Северный Кавказдиъ терроризм тарг акьуб. Инсанарин гучI гьаттархьуне, сакинди рекъуьъ аруцуне, яшамиш алтухъ хьуне. Мин ахиран чIалар, «Работайте, братья» хьуне. Ме чIалар са дакьикьайин арайиъ кIилди дуньяйиди далгъуне. Мебурикес халисан девиз хьуне джалла инсанарис, Iари погонар алеттарис кидавай, гьер са ватанперас инсандисра. Чин кIилар агьукIуна икрам аркьа Нурбагандован игит велдис, дегIвин дженгерин рекъуьъ чиппин ватандин садвел, шадвел, ислехIвел ухIай, чиппин джигьил Iуьмурар, джанар пуч акьу аскерарис… Работаем, брат!» — пуне Сергей Меликова.
Хабди гъургъуне Нурбаганд Нурбагандов. Учин ахттилатигI ми чугъсагъул пуне джалла хье дагъусттандин джемеIетис, чиппин хизандис ягIара кехIей ирцIанди аме май илдис, иджвелис.
«КIиркI кIи ягъанилас ягIа ери ис алттушуная. Че хизандис ппара хIа кумак э чун гьемишан багулив хьуб. Иджвелин чIалар зе хизан бадалди чес ягIара ппара унихьай ве. Час ягIайдава, чве майил дахьухаб, чин ме къакъна дард фиштти гъадивуна арайил хьас ичин. Iу агъзурпе исари ппара джигьилар ушуне дуньяйилас. Ме ппара четин вегIда хьуне хье рес публикайис. Ппара Iайи гъамаз хьуна уйи терроризмна бандитизм. Хье ватандин президент Владимир Путинан зурбавел ппара хьуна, хьин гъалибвел гъушуне ме рекъуьъ, тарг акьуне ме кIватIалар», — пуне игитин дада.
Ме гъургъуна ккиркIухаб, РФ Игитин фикир бадалди са дакьикьайи джаллабур буIуне. Сергей Меликова, Нурбаганд Нурбагандова, Магомед Нурба гандован кIиркIара алийине памятникдил тукар. Памятник дахъуна кканде пуна, ке удигьай кIвал акьуне РДйин хIатти, ме кардис майил йине терроризмдихъай дженг дивубан Фондунира. Ме мегIракайил Сергей Меликова пуне СВОйин садпе игит Нурмагомед Гаджимагомедовасра памятник дахъасе пуна.
Салихат Малагусейнова
