ХIурариъ яшамиш вея инсанарис рекъуьн кар ппара хIа э. Саддалара ме кардис ппара четинди ая рекъукк кидава варха хIурарис. ГIулана угъа тегIде угъалари хье рекъерис ппара зарар ирцIанде. ХIа гъванар, музе къуттар, ругар кам акьас вейдава хье багварин рекъерилас. Миштти хьугуна, са машинивасра найчра тIушасра вейдава.

Сад миштти рекъ бадалди четинди ая хIур э Iемухъра. Мисаъ Типпигъарин хIуриас Iемухъди вере рекъуьн чIир хьуна уйи хьибу агъзур митIридегьен манзил. Ме кар бадала хье райондин рекъерин идара ДЭП №1 ппара хъучавея мевус арайил акьуна, рекъ майдан акьас.

ЯгIайин ягъас найисахъди рукьуна айчина ме рекъ батIар акьубан курар, зун ахттармиш акьуне ДЭП №1 хIаттивас Омар Магомедовавас.

«Зе работникара, чахъ хъаядегьен техникара кар аркьая агьал Iемухъарин рекъ батIар аркьай. Че кьастт э вередегьен дахи мевус акьуна ккиркIвас, Iайи мекIер верегунас. Ппара четинди уйи мисан кар машинар ушубасра. Чин кеттирхIуна IирIера акьуне мевус, алттирхIуна дузра аркьая. Гьалдис хIапай курар чин акьуна ая, чlукьар, музарар э амеф», — ахъакьуне ДЭПдин хIатти.

Ме рекъ кидавай, мебури Гехъуьнарин хIурин ккерчIу цалара батIар аркьая 7 митIри дегьен манзили. Ме усра батIарди IирIира, цIуьппера верегъилди аркьая.

Омар Магомедован чIаларилди, джалла ме курар арайил акьас хьуф хье Дагъусттандин Дагавтодордин кумакилди э. Хье райондин ДЭПдинра, хъара хье хIаттин Закир Каидован тIалабилди э мебур мисахъ хъучушуфра.

Ушу хIефттайи, мисаъ акьу курар, акьас ккиме курар ахттармиш акьас мич ушуна уйи хье райондин хIаф Закир Каидовра. Учис агвар акьу курарил рази хьуне, идже кьиматра йине хIатти. Хьудегьен дахи акьуна ккиркIучи иджи э пуна, насихIетра акьуне мисаъ кар аркьаттарисра, Iайи Iурдариди ачудушуна. Ме кардихъас техIкумвел хъая мебурихъ чиппихъра мисаъ кар аркьа усттабурихъ.

 

Батитай Габибулаева