Дуньяйин варттал савабин курар ппара ая. Гьерттин фикирди аве, яраб фи кар акьуна савабар къазамиш аркьагьан пуна. ХIа савабарикес хIисаб аркьа булахар, рекъер акьуб. Ппара хIа фикир ирцIанди ая агьал рекъерин курарис, четинвеларис. Авал вахттарихъ хъуттурфуна, агьал райондин рекъер батIар акьуная. Алтухъ машинара адава вахттари, са-са автобусар ая вегIдайи ппара четин вейи инсанарис шагьурариди ушуна адис. Гъагьатай, алатай гъванаригIас, уркIариас хIуриди рукьагунас даллу хьуна авейи инсанар, ругIуна ахъуф суман хьуна джанара. Гьал ме кардис ппара рехIетар хьуная, шергве рекъер, булди машинар, маршруткабур ая инсанарис.
Мишттин варха рекъер кидавай, агьал дуз аркьая хIурариас хIурариди вере рекъера. Гьеме ягъари башламиш акьуная дуз акьас Типпигъарин хIурин «Раттарихъ» агъа ус. ЯгIайин ягъас ме мукь хIурин яI хIисаб э. Фи мегIрака хьучира, инсанар мич завал ве. Багулив больница, дукванар ая, инсанара джалла хIурариас мич ппара завал ве. Ади багвариас емишар, кунар, къабар фай масса йис адиттарира мисаъ базар дархъа. Угъал, кулак, хIа ибхь угъу вахттуни мисаъ балчикъ хьуна инсанарис хIуьчIансузвелар вейи. Багулив фая хулариъ хьу цIакинара мисаъ э аркьаф. Угъа вахттуни кунар, лекар кIилди балчикъари куранди. Сайишттира хIурин яI хьунагуна ме усаъ, ухьттанди агвас батIар акьуна кканди уйи.
Ме курар аркьаф «Мой Дагестан-Мои дороги» агъа Республиканский программайилди э. Хъара хье райондин хIаттин, Каидов Закир Гусейновичан кумакра фай, башламиш акьуная мисаъ курар. Сифтта, башламиш акьастти, акьуне конкурс, найе идарайи акьас ичин мисан курар. Джалла конкурсдигI гIачучIу идарабурикес гъалибвел гъушуне «ООО Атлант-Трейд» агъа рекъерин курар аркьа идарайи. КIилди мисаъ аркьая курарис фатуная миллиондилас вартт пул. Сифтта башламиш акьуне мебури, хъучикуна хIа, бульдозерна грейдер, дуз аркьай, герек дава ругар, гъванар ккегъархъай, хабди файдина ахъуне хIа къуттар, гьал файдиная музе къуттар. Мебур майдан аркьай мисаъ кар аркьай ая грейдерна каток. Майдан акьухаб, башламиш акьасе мисал асфальт алихьас. Ме кIилди курар акьуна ккиркIухаб, мисан гьава джуре хьасе, хIа хьуф суманра кегьей хьасе. Мункинвелар инсанарис цIакIин-гамачI акьас, ярмаркабур арайил акьас ппара хьасе. Мишттин мукьари хIурин ухшарвелра аркьа.
Луиза Гусукаева
